عائشہ فاروقی کو امریکن چیمبر آف کامرس کی جانب سے ان کی خدمات پر دیے گئے ایوارڈ کی خوشی میں عشائیہ کا انعقاد

عشائیہ کا اہتمام میاں محمد ایوب سینئر نائب صدر نے کیا

گلسانہ منشاء کی علمی خدمات کا بھی دل کھول کر اعتراف کیا گیا

معروف شاعر امجد اقبال امجد کی شرکت نے محفل میں ادب کی بہار کھلا دی

دبئی (طاہر منیر طاہر سے) چیئرپرسن ہنڈي کرافٹس ایسوسی ایشن آف پاکستان محترمہ عائشہ فاروقی اور محترمہ گلسانہ منشاء، نامور ماہرِ تعلیم کے اعزاز میں ایک شان دار عشائیہ دیاگیا ۔عشائیہ کا اہتمام میاں محمد ایوب سینئر نائب صدر نے کیا،یہ تقریب بالخصوص عائشہ فاروقی کو امریکن چیمبر آف کامرس کی جانب سے ان کی خدمات پر دیے گئے ایوارڈ کی خوشی میں منعقد کی گئی، جبکہ گلسانہ منشاء کی علمی خدمات کا بھی دل کھول کر اعتراف کیا گیا۔

تقریب کا مقام لاہور کا معروف کیفے "تندوری ٹی اینڈ کمپنی” تھا، جو اس موقع پر خوشبو، چراغاں، اور مہمانوں کی رونق سے جگمگا اٹھا۔ رؤف ٹاپ پر بہتی خنک ہوا، روشنیوں کا کھیل، اور مہمانوں کی دل پذیر موجودگی نے رات کو ایک خواب ناک لمحے میں بدل دیا۔ تقریب کے معزز مہمانانِ خصوصی میں محترمہ گلسانہ منشاء اور پاکستان کے ممتاز کارڈیک سرجن ڈاکٹر پرویز چوہدری شامل تھے، جنہیں نہ صرف طبی دنیا میں ان کے شاندار کارناموں کے باعث جانا جاتا ہے بلکہ ان کی علم دوستی، شائستگی، اور تہذیبی وقار بھی اپنی مثال آپ ہے۔

ان کی موجودگی نے محفل کو ایک ایسا علمی اور شرافت آمیز رنگ عطا کیا، جس نے ہر دل کو متاثر کیا۔ ان کی گفتگو میں فہم، وقار اور دل سوزی کا حسین امتزاج موجود تھا، جو عشائیے کو فکری گہرائی سے آراستہ کر گیا۔معروف شاعر امجد اقبال امجد کی شرکت نے محفل میں ادب کی بہار کھِلا دی۔ ان کے اشعار اور سخنوری نے اہلِ دل کو مسرور کر دیا۔ عائشہ فاروقی کی سیکرٹری عظمیٰ حمزہ نے بھرپور جذبے سے ان کی فنی و انتظامی خدمات کا ذکر کیا اور ان کی قائدانہ صلاحیتوں کو خراجِ تحسین پیش کیا۔

پروفیسر ڈاکٹر مدیحہ بتول نے اپنے فکری نکات سے علمی افق روشن کیا، جب کہ محترمہ دعا کی باوقار آمد، گفتگو کا سلیقہ، اور خوش لباسی کسی فلمی ہیروئن کی جھلک لیے ہوئے تھی۔معزز مہمانانِ گرامی محمود بھٹی اور صفدر نے اپنی بصیرت آمیز گفتگو سے محفل میں فکری گہرائی پیدا کی۔ ہر موضوع پر ان کی گرفت اور اندازِ بیان نے محفل کو سکوتِ سامعین میں بدل دیا۔تقریب کی دلکشی اس وقت مکمل ہوئی جب ON News کے چیئرمین رانا راشد ڈیال اور محترمہ جنت تشریف لائیں

۔ ان کی آمد سے محفل میں محبت، تہذیب اور خوشگوار مزاج کا عجب امتزاج پیدا ہوا۔یہ عشائیہ صرف ایک تقریب نہ تھا، بلکہ ایک تہذیبی تجربہ، ایک ادبی جشن، اور ایک فکری محفل تھی — جس میں کراچی کی لطافت، لاہور کی محبت، اور پاکستان کی خوشبو جھلک رہی تھی۔ایسی محفلیں وقت کی کتاب پر سنہرے الفاظ سے رقم ہوتی ہیں۔