مشاعرہ میں متحدہ عرب امارات کے تمام مشہور شعراء کی بھر پور شرکت
مشاعرے کی صدارت ڈاکٹر صباحت عاصم واسطی نے کی
اردو زبان ایک مشکل دور سے گزر رہی ہے،جس کے فروغ کیلئے ادبی سرگرمیوں کا انعقاد کرنا بہت ضروری ہے،چوہدری خالد حسین صدر پاکستان سوشل سینئر شارجہ
دبئی (طاہر منیر طاہر) پاکستان سوشل سینئر شارجہ میں 75ویں یوم آزادی کے سلسلے میں چوہدری خالد حسین صدر پاکستان سوشل سینئر شارجہ کی سرپرستی میں جشن آزادی مشاعرہ کا اہتمام کیا گیا جس میں متحدہ عرب امارات کے تمام مشہور شعراء نے بھر پور شرکت کی۔
ڈاکٹر صباحت عاصم واسطی جن کا شمار اردو ادب کے نامور شعراء میں ہوتا ہے اور متحدہ عرب امارات میں وہ شعراءکی نظر میں اپنا ایک اہم مقام رکھتے ہیں انہوں نے مشاعرے کی صدارت کے فرائض انجام دیئے ۔ اس مشاعرے میں مہمان خصوصی اشرف شریف تھے جو پاکستان سے تشریف لائے وہ ایک بہترین شاعر بھی ہیں، انہوں نے اپنے اشعار سے سب کے دل موہ لئے مہمان اعزازی اعجاز شاہین تھے جو ادیب اور شاعر ہیں۔
وہ متحدہ عرب امارات میں اردو ادب کے حوالے سےاپنی ایک منفرد حیثیت اور پہچان رکھتے ہیں اور اردو ادب کی خدمت کرنے والی آرگنائزیشن کسوٹی جدید کے بانی بھی ہیں۔ نظامت کے فرائض شارجہ سوشل سینئر کی کلچرل ہیڈ صائمہ نقوی نے انجام دیئے۔
’’انداز بیاں اور‘‘کے آرگنائز ریحان صدیقی اور شرف ایکسچینج کے ڈائریکٹر عمادالملک جو اردو ادب سے بہت لگاؤ رکھتے ہیں انہوں نے خصوصی شرکت کی۔ بزم اردو کے اہم ممبران احیاء الاسلام ، سید سروش آصف جن کا شمار اردو ادب کے بہترین شاعروں میں ہوتا ہے، اپنے بہترین کلام سنا کر حاضرین سے خوب داد وصول کی۔ اپنا ایک الگ اور جدا انداز رکھنے والی شاعرہ عائشہ شیخ عاشی نے اپنے عمدہ اشعار سے جیسے مشاعرے میں جان ڈال دی ہو۔
ابو ظبی سے آئے مشہور شعراء ابرار ،مسرت اور احمد رضا نے اپنے خوبصورت اشعار سے سامعین سے داد وتحسین پائی، فجیرہ کے معید مرزا نے اپنے عمدہ اشعار سے محفل کی رونق بڑھا دی ۔ حنا عباس اور مسکان نے اپنے عمدہ اور بہترین اشعار سے محفل کا ماحول گرما دیا ۔ ذیشان سید مسعود نقوی، ذاور پرتیک نے بھی اپنے عمدہ کلام سے حاضرین کو نوازا۔
شیر اکبر آفریدی نےبہترین نعتیہ اشعار پڑھے ۔ پاکستان سوشل سینئر شارجہ کے ڈائریکٹر عمران رفیق نے سب کو خوش آمدید کہا اور ڈائریکٹر فراز احمد صدیقی نے سب کا شکریہ ادا کیا۔
عبدالوحید پال، سید سلیم اختر، ملک اسلم ،فرزانہ منصور، رانا ارشد،طارق ندیم، ملک شہزاد ، عارف حسین منہاس سطوت، زبیدہ خانم، انجینئر عظمان اور دیگر اہم شخصیات نے شرکت کر کے محفل کی رونق کو دوبالا کر دیا۔ چوہدری خالد حسین صدر پاکستان سوشل سینئر شارجہ نے پیغام دیا کہ آج جب اردو زبان ایک مشکل دور سے گزر رہی ہے ایسی ادبی سرگرمیوں کا انعقاد کرنا بہت ضروری ہے تاکہ اردو زبان کو فروغ مل سکے۔