انقرہ(مانیٹرنگ ڈیسک)ترکی میں تباہ کن زلزلے سے قبل پرندوں کی بے چینی کیمرے نے محفوظ کرلی۔
سوشل میڈیا پر وائرل ہونیوالی ویڈیو میں دیکھا جاسکتا ہے کہ زلزلہ آنے سے پہلے پرندے خلاف معمول ادھر ادھر اُڑتے پھر رہے ہیں جیسے انہیں معلوم ہو کہ کوئی بڑی آفت آنے والی ہے۔
امریکی جیولوجیکل سروے کے مطابق یہ پہلا موقع نہیں ہے کہ بڑے زلزلے سے قبل جانوروں کا عجیب و غریب رویہ دیکھا گیا ہو۔ شواہد بتاتے ہیں کہ جانوروں کو قدرتی آفات کا پہلے سے علم ہوجاتا ہے، تاریخ میں ملتا ہے کہ یونان میں جب 373 قبل مسیح میں زلزلہ آیا تھا تو کئی دن پہلے ہی چوہے، سانپ اور دیگر جانور وہاں سے بھاگ گئے تھے۔
ترکی میں پرندوں کے عجیب و غریب رویہ کی ویڈیو بہت سے لوگوں کے لیے توجہ کا باعث بنی ہے جس نے ایک بار پھر جانوروں کے زلزلوں کیلئے ابتدائی انتباہی اشارے کے طور پر کام کرنے کی صلاحیت کے بارے میں سوالات اٹھا دیے ہیں۔
سائنس دان ابھی تک یہ بتانے سے قاصر ہیں کہ زلزلہ آنے سے پہلے کچھ جانور عجیب و غریب رویے کا مظاہرہ کیوں کرتے ہیں؟۔ بعض لوگوں کا ماننا ہے کہ پرندے مافوق الفطرت قوتوں کا جواب دے رہے تھے۔