تقریب ایکسپو سینٹر لاہور میں 17 سے 19 اپریل 2025 تک منعقد ہونے والے ہیلتھ، انجینئرنگ، اینڈ منرلز شو (ایچ ای ایم 2025) کے چوتھے ایڈیشن کے سلسلے میں منعقد کی گئی
متحدہ عرب امارات میں مقیم کاروباری حضرات ایچ ای ایم 2025میں شرکت کیلئے اپنے نمائندے بھیجیں، حسین محمد قونصل جنرل
تقریب کا اہتمام ٹریڈ ڈویلپمنٹ اتھارٹی آف پاکستان نے ایکسپورٹ ڈویلپمنٹ بورڈ کے تعاون سے کیا
دبئی (طاہر منیر طاہر) قونصلیٹ جنرل آف پاکستان نے پاکستان بزنس کونسل دبئی کے تعاون سے پاکستان ایسوسی ایشن دبئی میں سحری کی تقریب "سحور” کا اہتمام کیا۔ یہ تقریب ہیلتھ، انجینئرنگ، اینڈ منرلز شو (ایچ ای ایم 2025) کے آئندہ چوتھے ایڈیشن کے سلسلے میں منعقد کی گئی جو ایکسپو سینٹر لاہور میں 17 سے 19 اپریل 2025 تک منعقد ہو گی۔
قونصل خانے کی جانب سے جاری بیان کے مطابق قونصل جنرل حسین محمد نے متحدہ عرب امارات میں مقیم کاروباری رہنمائوں پر زور دیا کہ وہ ایچ ای ایم 2025 میں شرکت کے لیے اپنے نمائندے بھیجیں اور پاکستان میں تجارت اور سرمایہ کاری کے وسیع مواقع تلاش کریں۔
انہوں نے شرکاء کو حکومت پاکستان کے مکمل تعاون کا یقین دلاتے ہوئے کہا کہ قونصل خانہ پاکستان آنے والے مندوبین کو تمام مطلوبہ مدد اور سہولت فراہم کرنے کے لیے موجود ہے۔ تجارت اور سرمایہ کاری قونصلر علی زیب خان نے کہا کہ تقریب کا مقصد خریداروں اور ممکنہ درآمد کنندگان کے وفد کو پاکستان کا دورہ کرنے اور میگا نمائش میں شرکت کے لیے تیار کرنا ہے۔
انہوں نے نمائش کی اہمیت پر روشنی ڈالی جس کا اہتمام ٹریڈ ڈویلپمنٹ اتھارٹی آف پاکستان نے ایکسپورٹ ڈویلپمنٹ بورڈ کے تعاون سے کیا۔ پاکستان بزنس کونسل دبئی کے چیئرمین شبیر مرچنٹ اور وائس چیئرمین کامران ریاض نے بھی اجتماع سے خطاب کیا اور نمائش میں شرکت کے لیے مختلف ممالک کی کاروباری برادریوں کو جوڑنے میں کونسل کے کردار پر زور دیا۔
ممتاز پاکستانی تاجر حسین داود نے حاضرین کی حوصلہ افزائی کی کہ وہ اس نمائش میں پیش کردہ مواقع سے فائدہ اٹھائیں۔انہوں نے پاکستان کے برآمدی شعبوں کو فروغ دینے اور اقتصادی شراکت داری کو مضبوط بنانے میں اس طرح کی نمائشوں کی اہمیت پر زور دیا۔
صحت، انجینئرنگ اور معدنیات کے شعبوں پر توجہ مرکوز کرنے کی حامل یہ ایک اہم تجارتی نمائش ہے جس میں الیکٹریکل مشینری، آٹوموٹو، پنکھے اور گھریلو برقی آلات، دواسازی، کاسمیٹکس، جراحی کے آلات، کیمیکل، ماربل اور معدنیات، تعمیراتی مواد، جواہرات اور زیورات، کھیلوں کے سامان، کٹلری اور کک ویئر، سٹیشنری، پیکجنگ میٹریل، فرنیچر ، میٹرس ، دستکاری ، پلاسٹک کی اشیاء اور حفاظتی سامان سمیت مختلف مصنوعات کی نمائش کی جاتی ہے۔