بڑے خواب ہی انسان کو بڑے مقصد تک لے کر جاتے ہیں،حمیرا نسیم ویمن سیکرٹری پی ٹی آئی دبئی
کوئی معاشرہ خواتین کے بغیر ترقی نہیں کر سکتا لہٰذا خواتین کو متحرک کردار ادا کرنا ہو گا،فرزانہ چغتائی
دبئی(طاہر منیر طاہر)پاکستان تحریک انصاف دبئی کے وومن ونگ کی طرف سے “جتنا بڑا خواب اتنا بڑا انسان“کے موضوع پرسیمینارمنعقد ہوا جس کا اہتمام حمیرا نسیم ویمن سیکریٹری دبئی نے کیا، تقریب میں فرزانہ چغتائی نائب صدر پی ٹی آئی یو اے ای، عنبرین علی، ماجدہ خانم، ماہرہ اسد، عمارہ آفتاب، حِنا عباسی،عصما رضا ، مدیحہ مسعود، حمیرا بشیر اور پی ٹی آئی اے تعلق رکھنے والی خواتین نےشرکت کی۔
تقریب کی اسٹیج سیکرٹری کے فرائض سعدیہ طارق ویمن سیکریٹری ام القوین نے انجام دیے، تقریب کا باقاعدہ آغاز تلاوت قرآن مجید سے عاصمہ فاطمہ نے کیا۔
تقریب کے شرکاء کے لیے جتنا بڑا خواب اُتنا بڑا انسان کے عنوان کو مدِنظر رکھتے ہوئے ویژن بورڈ بنانے کا اہتمام کیا گیا تھا جس میں خواتین اور خصوصی طور پر یوتھ نے بڑھ چڑھ کر حصہ لیا اور اپنے اپنے خوابوں کو حقیقت کی شکل دینے کی بنیاد رکھی۔
مقررین نے کہا کہ بڑے خواب دیکھنے کے بعد آپ بڑے بڑے مقاصد حاصل کر سکتے ہیں جیسا کہ علامہ اقبال نے خواب دیکھا اور قائداعظم نے اس خواب کو حقیقت میں تبدیل کرنے کے لیے جدوجہد کی اور آج ہم پاکستان کی آزاد فضا ئوں میں سانس لے رہے ہیں ۔
عمران خان نے خواب دیکھے تو آج شوکت خانم ہسپتال اور نمل جیسے بے مثال کامیاب ادارے بنائے اور جب پاکستانی سیاست میں تبدیلی کا خواب دیکھا تو 22 سالہ جدوجہد کے بعد وہ ایک ہجوم کو قوم بنانے کی راہ پر گامزن ہیں۔
فرزانہ چغتائی نے کہا کہ خواتین کو متحرک کردار ادا کرنا ہو گا کوئی معاشرہ بھی خواتین کی بغیر ترقی نہیں کر سکتا ،پی ٹی آئی خواتین کو سیاست میں بھی کردار ادا کرنے کی حامی ہے اور پی ٹی آئی متحدہ عرب امارات کی آج کی تقریب اسی سلسلے کی ایک کڑی ہے۔ تمام شرکاء نے حمیرا نسیم ویمن سیکریٹری پی ٹی آئی دبئی کا کامیاب پروگرام منعقد کرنے پر شکریہ ادا کیا۔