کوالالمپور(محمد وقار خان)ملائشیا میں منعقدہ دو روزہ MBW انٹرنیشنل تیکوانڈو چیمپئن شپ میں پاکستان تیکوانڈو ایسوسی ایشن کے نوجوان اور کمسن کھلاڑیوں نے شاندار پرفارمنس کے مظاہرہ کرتے ہوئے پاکستان کے لئے مجموعی طور پر 21 میڈلز جیت کر قوم کا سر فخر سے بلند کر دیا ۔
2 سے 4 اگست تک جاری رہنے والی انٹرنیشنل تیکوانڈو چیمپئن شپ میں ملائشیا ، جاپان، کوریا ، چائنہ، سنگاپور، ایران فلپائن اور پاکستان سمیت 21 ممالک کے 2500 کھلاڑیوں نے مختلف کیٹگریز میں شرکت کی ۔
پاکستانی سکول کے بچوں اور نوجوانوں پر مشتمل ہونہار کھلاڑیوں نے مجموعی طور پر7گولڈ میڈلز ، 6سلور میڈل اور 8 برونز میڈل جیت کر ، بین الاقوامی سطح پر تیکوانڈو کے میدان میں پاکستان کا نام روشن کیا ۔
پاکستانی ہائی کمیشن ان ملائشیا نے ملک کے ان مایہ ناز کھلاڑیوں کے اعزاز میں شاندار استقبالیہ دیا ۔
ہائی کمشنر سید احسن رضا شاہ نے کھلاڑیوں سے گفتگو کرتے ہوئے کہا کہ آپ جیسے ہیروز ہی وطن عزیز پاکستان کے حقیقی سفیر ہیں ۔ اور ہمارے سمیت پوری قوم دعا گو ہے کہ آپ اور پاکستان کا ہر ہونہار شخص ، ملک کا نام دنیا میں مثبت طور پر روشن کرے ۔