ویانا (رپورٹ:محمد عامر صدیق) آسٹریا کے دارالحکومت ویانا میں دعوت اسلامی کے زیر انتظام سنتوں بھرا اجتماع استقبال ماہ ربیع الاول کا انعقاد بروز اتوار ویانا 23 ڈسٹرک کے مقامی ہال میں کیا گیا۔ اس سنتوں بھرے اجتماع کے لیے خصوصی طور پر پاکستان سے جانشین امیر اہلسنت مولانا حاجی عبید رضا عطاری المدنی مدظلہ العالی تشریف لائے۔ جس میں آسٹریا بھر کے مختلف شہروں سے اسلامی بھائیوں، بچوں اور بہنوں نے کثیر تعداد میں شرکت کی۔
اجتماع کا آغاز ارشد عطاری کی تلاوتِ قرآنِ پاک سے ہوا اور نعتِ رسولِ مقبول ﷺ کی سعادت یورپ کے معروف نعت خواں غلام مصطفی نعیمی اور شہریار خان کو حاصل ہوئی۔ جبکہ جانشین امیر اہلسنت مولانا حاجی عبید رضا عطاری المدنی مدظلہ العالیٰ نے سنتوں بھرا بیان کرتے ہوئے عاشقانِ رسول کی دینی و اخلاقی اعتبار سے تربیت کی اور سیرت النبی ﷺ کے اہم پہلوئوں پر روشنی ڈالی نیز ماہ میلاد کی خوشی میں عاشقانِ رسول نے نعرے بھی لگائے،مرحبا یا مصطفیٰ ؐ کی صدائیں بلند کیں، جس سے عاشقان رسولؐ جھوم اٹھے ۔
اپنے خصوصی بیان میں جانشین امیر اہلسنت مولانا حاجی عبید رضا عطاری المدنی کا کہنا تھا کہ میں سب سے پہلے آپ تمام لوگوں کا شکریہ ادا کرنا چاہتا ہوں کہ جو اس اجتماع میں شریک ہوئے۔ مزید ان کا کہنا تھا کہ عید میلادُ النبی کے موقع پر خُوشی کا اظہار کرنا اور محافل و جلوس میلاد کا انعقاد کرنا رسول کریمؐسے محبت کی علامت ہے۔
ہر سال ربیع الاوّل کے مقدّس مہینے میں عاشقانِ رسول اپنے پیارےمصطفےٰؐ سے عشق ومحبت کا اظہار کرتے ہوئے جلوسِ میلاد اور محافلِ میلاد کا اہتمام کرتے ہیں۔ عاشقانِ رسولؐ کی مدنی تحریک دعوتِ اسلامی کے تحت بھی دنیا بھر میں عید میلاد النبی ؐ بڑی عقیدت و احترام سے منائی جاتی ہے۔
اجتماع کہ آخر میں سب نے مل کر صلوۃ السلام کا نظرانہ پیش کیا اور جانشین امیر اہلسنت مولانا حاجی عبید رضا عطاری المدنی مدظلہ العالیٰ نے امیر اہل سنت، تمام مسلم امہ اور حاضرین، ملک فلسطین و کشمیر اور پاکستان کے لیے خصوصی دعا کی ۔
بعد ازاں لوگوں نے جانشین امیر اہلسنت مولانا حاجی عبید رضا عطاری المدنی مدظلہ العالیٰ سے مصافحہ کیا اور اپنے لیے خصوصی دعائیں کروائیں۔ آخر میں ربیع النور کی نسبت سے لنگر پیش کیا گیا۔