انہوں نے اردو اور پنجابی زبان میں 32 کتابیں لکھیں اور متعدد رسائل و جرائد کے مدیر بھی رہے
والتھم فارسٹ کی مئیر کونسلر شیرن والڈرون نے امجد مرزا امجد کی کمیونٹی خدمات کو خراج تحسین پیش کیا
تعزیتی تقریب کے آخر میں مرحوم امجد مرزا امجد کی بخشش و مغفرت کیلئے دعا بھی کی گئی
دبئی (طاہر منیر طاہر سے) والتھم فارسٹ پاکستانی کمیونٹی فورم کے سیکریٹری امجد مرزا امجد مرحوم کے سانحہ ارتحال پر والتھم سٹو کے ہارمونی ہال میں 12 اپریل 2025 کو تعزیتی ریفرنس کا انعقاد کیا گیا جس کا اہتمام راجہ محمد الیاس، والتھم فارسٹ اسلامک ایسوسی ایشن اور ڈاکٹر رشید اخترپاک کلچرل سوسائٹی نے کیا۔
اس موقع پر اپنا اظہار خیال کرتے ہوئے تعزیتی ریفرنس میں شریک لوگوں نے مرحوم کے ساتھ اپنے تعلقات اور مرحوم امجد مرزا امجد کی کمیونٹی اور ادبی خدمات کو سراہا،امجد مرزا امجد نے اردو اور پنجابی زبان میں 32 کتابیں لکھیں، وہ متعدد رسائل و جرائد کے مدیر اور ناشر بھی تھے۔
امجد مرزا امجد والتھم فارسٹ پاکستانی کمیونٹی فورم کے سیکریٹری کی حیثیت سے ہر مہینےکے پہلے اتوار شاعری کی محفل منعقد کرتے تھے جس میں لندن اور دور دراز سے لوگ شامل ہوتے تھے، وہ دیگر شعرا کی لکھی شاعری کی نوک پلک درست کرنے کے علاوہ ان کتابوں کی رسم اجرا بھی کرتے تھے،اردو ادب کے لئے انکی گرانقدر خدمات ہمیشہ یاد رکھی جائیں گی۔
امجدمرزا امجد ایک اچھے فوٹو گرافر بھی تھے،وہ اردو ادب، یوم پاکستان اور یوم آزادی کی تقریبات کی فوٹوگرافی بھی کرتے تھے، لوگ انہیں ہرفن مولا کہتے تھے،تقریب کے مہمان شعرا نے مرحوم کی لکھی شاعری پڑھنے کے علاوہ اپنی شاعری جو خصوصا مرحوم کے لکھی گئی تھی سنائی، تقریب کی مہمان خصوصی والتھم فارسٹ کی مئیر کونسلر شیرن والڈرون تھیں۔
انہوں نے مرحوم امجد مرزاامجد کی کمیونٹی خدمات کو سراہا اور انکی اچانک وفات پر افسوس کرتے ہوئے کہا کہ وہ انکی فیملی کے افسوس میں برابر کے شریک ہیں،دیگر کمیونٹی اکابرین میں چوہدری محبوب، ایسٹ ہیم پاکستانی کمیونٹی فورم، قیصر محمود علامہ اقبال اکیڈمی، ولایت کھوکھر، کیپٹن جاوید، ضیا حسین احمد، پروفیسر شاہد اقبال، کونسلر راجہ انور، کونسلر رچرڈ سویڈن اور دیگر شامل تھے۔
پروگرام کی صدارت ڈاکٹر رشید اختر نے کی جبکہ چوہدری محبوب نے سٹیج سیکریٹری کے فرائض انجام دیے، تعزیتی تقریب کے آخر میں مرحوم امجد مرزاامجد کی بخشش و مغفرت کے لیے دعا کی گئی جبکہ مہمانوں کی تواضع اشیائے خورد و نوش سے کی گئی۔