پاکستان پریس کلب برطانیہ کے صدر شیراز خان کی جانب سے راجہ عباس اور دیگر رہنمائوں کے اعزاز میں استقبالیہ
لوٹن(رپورٹ :عتیق الرحمن چوہدری)پاکستان پریس کلب برطانیہ کے صدر شیراز خان کی جانب سے کینیڈا سے دورہ برطانیہ پر آئے ہوئے مہمان راجہ عباس ،ممتاز کشمیری رہنما چیئر مین پاک کشمیر سپریم کونسل راجہ سکندر خان،پیپلز پارٹی آزاد کشمیر کے سابق امیدوار اسمبلی اشرف چغتائی ،کوٹلی آزاد کشمیر سے راجہ وقاص ایڈووکیٹ ،پی ٹی آئی رہنما غیاث احمد ایڈووکیٹ کے اعزاز میں ایک مقامی ریسٹورنٹ میں دعوت استقبالیہ کا اہتمام کیا ۔
استقبالیہ میں ہاؤس آف لارڈز کے تاحیات رُکن لارڈ قربان حسین نے خصوصی طور پر شرکت کی جبکہ چوہدری حاجی چوہدری قربان، راجہ اعجاز سمیت صحافیوں میں راجہ فیض سلطان،کامران عابد بخاری ،عتیق الرحمان چوہدری،احتشام الحق قریشی نے شرکت کی۔
اس موقع پر لارڈ قربان حسین نے کہا کہ فلسطین کے ایشو کی وجہ سے اس وقت پوری دنیا تقسیم ہوچکی ہے اور کمیونٹیز کے درمیان نفرتیں بڑھ رہی ہیں، ضرورت اس امر کی ہے کہ فوری جنگ بندی کی جائے اور امن کو موقع فراہم کیا جائے ۔
صدر پاکستان پریس کلب برطانیہ شیراز خان نے کہا کہ حق و سچ کی آواز بلند کی جاتی رہے گی، راجہ وقاص، غیاث احمد اور راجہ فیض سلطان نے بھی فلسطینیوں پر اسرائیلی بمباری کی مزمت کی ۔
راجہ عباس،راجہ سکندر،اشرف چغتائی اور دیگر نے فلسطین میں جاری اسرائیلی مظالم پر عالمی طاقتوں کی خاموشی اور دوہرے معیار کو افسوسناک قرار دیا اور فوری طور پر سیز فائر کر کے غزہ کا محاصرہ ختم کرنے کا مطالبہ کرتے ہوئے اقوام متحدہ سے فلسطین کے معصوم شہریوں کا قتل عام بند کروانے اور خطے میں پائیدار حل ڈھونڈنے کی ضرورت پر زور دیا ۔
حاجی چوہدری قربان نے کہا ہے کہ فلسطینیوں کے حق میں بڑے مظاہرے ہو رہے ہیں اور ظلم و زیادتی پر دنیا لرز گئی ہے، اس کے باوجود جنگ بندی نہیں ہو رہی ۔