پارٹی کے57 ویں یوم تاسیس پرشہدائے پارٹی کو خراج عقیدت پیش کیا گیا
ملک و قوم کے لیے پارٹی کی خدمات اور قیادت کی قربانیوں کو بھی سراہا گیا
پار ٹی کارکنان شہداء کے نظریات کو مشعلِ راہ بناتے ہوئےعوام کی خدمت اور پارٹی کی مضبوطی کے لیے اپنی جدوجہد جاری رکھیں، مقررین
دبئی (طاہر منیر طاہر) پیپلز یوتھ آرگنائزیشن PYO دبئی کے زیر اہتمام پیپلز پارٹی کے یومِ تاسیس اور شہدائے پارٹی کو خراج عقیدت پیش کرنے کے لیے ایک پروقار تقریب کا انعقاد کیا گیا۔ اس موقع پر پارٹی کے رہنماؤں، کارکنان، اور دیگر معزز مہمانوں نے شرکت کی۔
تقریب میں صدر PYO یو اے ای فاروق بانیاں، جنرل سیکریٹری سردار عابد بشارت، سینئر نائب صدر حافظ ارشد محمود اور صدرPYO دبئی یونٹ ملک راشد سمیت دیگر رہنماؤں نے خصوصی شرکت کی۔تقریب میں پاکستان پیپلز پارٹی کے 57 ویں یوم تاسیس کے حوالے سے ملک و قوم کے لیے پارٹی کی خدمات اور قیادت کی قربانیوں کو سراہا گیا۔
مقررین نے آزاد کشمیر کی سیاست میں ایک یونیورسٹی کی حیثیت رکھنے والے شہید مطلوب انقلابی، سردار غلام صادق مرحوم، اور ملک میر زمان مرحوم کی خدمات کو بھرپور خراج تحسین پیش کیا۔تقریب کے دوران مقررین نے پارٹی کے نظریے، بیانیے، اور قربانی کی لازوال داستان پر روشنی ڈالی۔
شہدائے پارٹی کی قربانیوں کو یاد کرتے ہوئے اس عزم کا اظہار کیا گیا کہ ان کے مشن کو جاری رکھا جائے گا اور پاکستان پیپلز پارٹی کے اصولوں کو مضبوطی سے تھامے رکھا جائے گا۔یہ تقریب پارٹی کے تاریخی کردار، عوامی جدوجہد، اور قربانیوں کی یاد دہانی کے ساتھ ساتھ نئے ولولے اور جذبے کے ساتھ آگے بڑھنے کی ایک علامت تھی۔
مقررین نےپار ٹی کارکنان پر زور دیا کہ وہ شہدائے پارٹی کے نظریات کو مشعلِ راہ بناتے ہوئے عوام کی خدمت اور پارٹی کی مضبوطی کے لیے اپنی جدوجہد جاری رکھیں۔