برلن (رپورٹ:مطیع اللہ) سفارت خانہ پاکستان برلن نے ٹریڈ ڈویلپمنٹ اتھارٹی آف پاکستان (TDAP) کے تعاون سےپاکستانی ثقافت اور سیاحت کی عکاسی کرنے والی ایک تقریب کا انعقادکیا، ITB 2025 کے موقع پر پاکستان کی جانب سے یہ پہلی تقریب تھی جس میں ITB کے زائرین شرکاء کو پاکستانی سیاحت اور ثقافت سے متعارف کرایا گیا۔
سفیر ثقلین سیدہ نے مہمانوں کا خیرمقدم کیا اور اس بات پر زور دیا کہ پاکستان کا قومی و صوبائی ثقافت اسے دنیا بھر سے آنے والے سیاحوں کے لیے ایک منفرد مقام بناتے ہیں کیونکہ ہماری سیاحت صرف روایتی سیر و تفریح تک محدود نہیں بلکہ مذہبی سیاحت، مہم جوئی کے کھیل، آثار قدیمہ، اور منفرد فنون کے شہہ پاروں کے کھوج کا احاطہ کرتی ہے، دنیا کو ہماری علاقائی ثقافت، کھانوں، موسیقی اور لباس کے بارے میں بھی جاننے کی ضرورت ہے۔
سفیر کی تقریر کے بعد منیجنگ ڈائریکٹر گرین ٹورازم پاکستان ریٹائرڈ حسن اظہر حیات نے ایک تفصیلی تعارف پیش کیاجس میں انھوں پاکستان میں سیاحت کے فروغ کے لیےمنتخب کیے گئے شعبوں اور اقدامات پر روشنی ڈالی۔
منیجنگ ڈائریکٹر سندھ ٹورازم ڈویلپمنٹ کارپوریشن (STDC) سیدفیاض علی شاہ، اور سیکریٹری سیاحت گلگت بلتستان (جی بی)، ضمیر عباس نے بھی بالترتیب سندھ اور جی بی کے سیاحتی مقامات کے بارے میں تفصیلی بریفنگ دی ۔
مقررین نے سامعین پر زور دیا کہ وہ پاکستان آمد سے قبل ویزوں کی سہولت سمیت حکومت کی فراہم کردہ سہولت کاری کے طریقہ کار سے فائدہ اٹھاتے ہوئے پاکستان کا دورہ کریں۔ انہوں نے اس سلسلے میں سفارتخانے کے تعاون کی بھی تعریف کی اور امید ظاہر کی کہ مستقبل میں آئی ٹی بی کی نمائش میں پاکستان کی شرکت مزید بہتر انداز میں ہو گی۔
مہمانوں کو پاکستانی علاقائی ملبوسات سےروشناس کرانے کے لیے کمیونٹی اور اسٹوڈنٹس کی جانب سے ثقافتی واک بھی کی گئی۔ مہمانوں نے خوبصورت ملبوسات کو خوب سراہا۔ اس موقع پر پاکستان کے مشہور کلاسیکی اور نیم کلاسیکل گانوں پر رقص بھی پیش کیا گیا۔
اختتامی پرفارمنس کے طور پر استاد اشرف شریف خان اور گروپ کی طرف سے پیش کی گئی، علاقائی/لوک دھنوں نے سامعین کو مسحور کر دیا۔ تقریب کو مکمل بنانے کے لیے مہمانوں کی تواضع روایتی پاکستانی کھانوں اور مٹھائیوں سے کی گئی لوگوں نے ان کے ذائقے کو بھی خوب سراہا۔تقریب میں بین الاقوامی مہمانوں کی بڑی تعداد نے شرکت کی اور لطف اندوز ہوئے۔