پیرس(سلطان محمود سے) فرانس کے دارالحکومت پیرس میں مقیم ہزاروں پاکستانیوں نے سبز ہلالی پرچم اٹھائے بھارتی آبی جارحیت ،دہشت گردی اور جنگی عزائم کے خلاف بھرپور احتجاجی مظاہرہ کیا۔پیرس کی فضائیں پاکستان زندہ باد، پاک فوج زندہ باد ،مودی ٹیرورسٹ، انڈیا ٹیرورسٹ، پاکستان ہمیشہ زندہ باد ،کے فلک شگاف نعروں سے گونج اٹھیں ۔
پیرس ایفل ٹاور کے سامنے پوری دنیا سے آئے ہوئے سیاحوں کی کثیر تعداد نے پاکستان کےسبز ہلالی پرچم کو دیکھ کر تالیاں بجاکر مظاہرین کے ساتھ اظہار یکجہتی کیا ۔مظاہرے میں پیرس میں مقیم پاکستان اور کشمیر کے مختلف علاقوں سے تعلق رکھنے والے افراد نے سیاسی ،لسانی تعصب سے بالاتر ہوکر پاکستانی کی حیثیت سے شرکت کی۔
اس موقع پر پولیس اور قانون نافذ کرنے والے اداروں کی بہت بڑی تعداد کسی بھی قسم کے ناخوشگوار واقعہ سے نمٹنے کے لیے تعینات کی گئی تھی۔پیرس میں ہونے والے احتجاجی مظاہرہ کی بڑی خصوصیت یہ تھی کہ کسی بھی سیاسی جماعت کا کوئی پرچم نہیں لہرایا گیا بلکہ تمام سیاسی جماعتوں کے راہنماؤں اور کارکنان نے سیاسی وابستگیوں سے بالاتر ہوکر پاکستان کے دفاع کو ناقابل تسخیر بنانے کے لیے سیسہ پلائی ہوئی دیوار بننے کا عملی مظاہرہ کیا۔
شرکاء نے اس عزم کا اعادہ کیا کہ وہ بھارت کی کسی بھی قسم کی جارحیت اور جنگی عزائم کو خاک میں ملانے کے لیے اپنی جانیں قربان کرنے کے لیے ہمہ وقت تیار ہیں، زرمبادلہ زیادہ مقدار میں بھیج کر پاکستان کو معاشی و اقتصادی اور دفاعی لحاظ سے زیادہ مضبوط بنائیں گے۔
دو گھنٹے سے زائد وقت تک ایفل ٹاور پیرس کی فضاؤں میں پاکستان زندہ باد اور پاک فوج زندہ باد کے فلک شگاف نعرے گونجتے رہے، پاکستان فیڈرل یونین آف جرنلسٹس کے صدر محمد افضل بٹ نے بھی خصوصی طور پر شرکت کی۔
آرگنائزرز صاحبزادہ عتیق الرحمن ، سردار ظہور اقبال ، نعیم چوہدری ، عصمت اللہ تارڑ ، چوہدری منیر وڑائچ ، چوہدری گلزار ، یاسر قدیر ، ملک عابد ، زاہد ہاشمی ، چوہدری اعجاز جٹ ، محمد قادر نے تمام حاضرین کا شکریہ ادا کیا، بعدازاں مظاہرین پر امن طور پر منتشر ہوگئے۔