کیف (تارکین وطن نیوز)روس کی یوکرین میں پیش قدمی اور جان گنوا دینے کے ڈر سے ایک ماں نے اپنی بیٹی کی کمر پر اپنے خاندان کے دیگر افراد کے نام اور ان کے نمبرز لکھ دیے ہیں۔ٹوئٹر پر وائرل ہونے والی ایک تصویر میں ایک بچی کی کمر پر اس کا نام، کچھ فون نمبرز اور نام لکھے دیکھے جاسکتے ہیں۔
یہ تصویر ٹوئٹر پر یوکرینی صحافی انستاسیا لپاتینا نے منگل کو شیئر کی اور لکھا کہ یوکرینی مائیں اپنے بچوں کے جسموں پر خاندان والوں کے رابطہ نمبر لکھ رہی ہیں تاکہ اگر وہ ماری جائیں تو ان کے بچوں کی پہچان ہوسکے۔یہ تصویر یوکرینی صحافی سے قبل اس بچی کی ماں الیکزینڈرا ماکو نے تین دن قبل انسٹاگرام پر شیئر کی تھی۔
Ukrainian mothers are writing their family contacts on the bodies of their children in case they get killed and the child survives. And Europe is still discussing gas. pic.twitter.com/sK26wnBOWj
— Anastasiia Lapatina (@lapatina_) April 4, 2022
اس تصویر کے ساتھ لکھی گئی تحریر کو یوکرینی زبان سے انگریزی میں ترجمہ کرنے سے پتہ چلتا ہے کہ بچی کی ماں چاہتی ہیں کہ اگر انہیں کچھ ہوجائے تو ان کی بیٹی کو لوگ پہچانیں اور ان کا خیال رکھیں۔ایک اور تصویر میں الیکزینڈرا ماکو نے کہا کہ ان کا خاندان اب محفوظ ہے لیکن پھر بھی اپنی بیٹی کی جیب میں رکھی ہوا پرچی نہیں پھینکیں گے جس پرخاندان کی تفصیلات درج ہیں۔
واضح رہے روس نے رواں سال فروری میں یوکرین میں ’سپیشل آپریشن‘ کا اعلان کیا تھا اور ایک ماہ سے زائد گزر جانے کے باوجود دونوں ممالک کے درمیان جنگ جاری ہے۔کچھ دن قبل برطانوی اخبار میں چھپنے والی خبر کے مطابق روسی افواج یوکرین میں اپنی حفاظت کے لیے بچوں کو ’ہیومن شیلڈ‘ کے طور پر استعمال کررہی ہیں۔
رپورٹ میں دعویٰ کیا گیا تھا کہ یوکرین کے کئی علاقوں میں روسی افواج نے بچوں کو یرغمال بنایا ہے تاکہ مکینوں کو ان علاقوں میں روسی افواج کی موجودگی کی معلومات یوکرینی فورسز کو دینے سے روکا جاسکے۔