آنے والے جنرل انتخابات ملکی تاریخ میں اہم کردار ادا کریں گے،امجد ملک
پاکستان کے مستقبل کو محفوظ کرنے میں اوورسیز پاکستانیوں کا بہت بڑا کردار ہے
دبئی سے لندن گئے سہیل عامر گھمن اورعرفان اقبال طورکی بیرسٹر امجد ملک سے ملاقات
دبئی (طاہر منیر طاہر) پاکستان مسلم لیگ ن کے سنیئر نائب صدر اور چیف کوآرڈینیٹر انٹرنیشل افیئرز بیرسٹر امجد ملک نے کہا ہے کہ 9 مئی کے واقعات نے سیاستدانوں کیلئے ایک ریڈ لائن کھینچ دی ہے۔ آنے والے جنرل انتخابات ملکی تاریخ میں اہم کردار ادا کریں گے۔ عوام کے مینڈیٹ دینے کے حق کو تسلیم کرنا ہوگا اور تجربات کی بجائے پارلیمان کو ووٹ کے زریعے بااختیار بنانا ہوگا۔
سیاسی سائنسدانوں کے احتساب اور قومی معاملات میں اصلاحات سے ملک ایک نئے دور میں داخل ہوجائے گا۔ یہ نہیں ہوسکتا کہ عوام بھوکے مریں اور حکمرانوں کے گھروں سے نوٹوں کی بوریاں برآمد ہوں۔ نوجوان نسل کو اقبال کی خودی اور قائد اعظم کی گورننس اور کفایت شعاری کا پیغام دینے کی ضرورت ہے۔
راچڈیل میں چیئرمین مسلم لیگ ن دبئی سہیل عامر گھمن اور سیکرٹری جنرل مسلم لیگ ن شارجہ عرفان اقبال طورسے بات چیت کرتے ھوئے انہوں نے کہا کہ اوورسیز پاکستانی ہمارے ملک کے سفیر ہیں۔ پاکستان کے مستقبل کو محفوظ کرنے میں اوورسیز پاکستانیوں کا بہت بڑا کردار ہے جو بیرون ملک سے پچیس بلیئن کا زر مبادلہ بھیجتے ہیں۔
انہوں نے کہا ہم مسلم لیگ ن کے پلیٹ فارم سے تارکین وطن کی داد رسی کیلئے کوئی کسر نہیں چھوڑیں گے۔ اوورسیز پاکستانیوں کو پارلیمان میں حق نمائندگی، انکی جائز شکایات کا ازالہ، پاکستان آنے جانے میں سہولیات، سرمایہ کاری اور جائدادوں کے تحفظ پر آواز اٹھانا ہماری اولین زمہ داری ہے۔ انہوں نے کہا اگر پارلیمان میں اوورسیز کی آواز گونجے گی تو انکے جائز معاملات پر دادرسی ہوگی۔
پاکستان مسلم لیگ ن دبئی کے سینئر راہنما سہیل عامر گھمن چیئرمین مسلم لیگ ن دبئی اور عرفان اقبال طور سیکرٹری جنرل مسلم لیگ ن شارجہ کی پاکستان مسلم لیگ ن کے سنیئر نائب صدر اور چیف کوآرڈینیٹر انٹرنیشل افیئرز بیرسٹر امجد ملک کیساتھ ملاقات میں کاروباری شخصیات چوہدری خالد محمود، راشد گھمن اور محمد کامران بھی شامل تھے،دوران ملاقات سہیل عامر گھمن نے کہا کہ دبئی مسلم لیگ ن کا قلعہ ہے اور انہوں نے ہمیشہ اپنی قیادت پر اعتماد کرتے ہوئے پاکستان کی خدمت کی ہے۔
عرفان اقبال طور نے کہا کہ وہ اس دورہ میں میاں محمد نواز شریف، میاں شہباز شریف اور اسحق ڈار سے مل کر بہت خوش ہوئے ہیں اور لیگی قیادت ہی مشکلات میں گھرے پاکستان کو مشکلات سے نکال سکتی ہے۔ سہیل عامر گھمن اور عرفان اقبال طور نے اپنی طرف سے اور مسلم لیگ ن دبئی کی طرف سے بیرسٹر امجد ملک کو مسلم لیگ ن کے چیف کوآرڈینیٹر انٹرنیشنل افیئرز اینڈ اوورسیز پاکستانیز اور سنیئر نائب صدر انٹرنیشنل افیئرز مقرر ہونے پر مبارکباد دی اور نیک خواہشات کا اظہار کیا۔
اس موقع پر بیرسٹر امجد ملک نےمہمانوں کو اپنی کتاب پاکستان کا سفر پیش کی اورپاکستان مسلم لیگ ن متحدہ عرب امارات کے چئیرمین محمد غوث قادری، صدرغلام مصطفی مغل اور سیکرٹری جنرل سمیت تمام عہدیداران کے لئے خیر سگالی کے جذ بات کا اظہار کیا- ملاقات میں دیگر پارٹی امور کے ساتھ ساتھ دبئی اور شارجہ میں تنظیم سازی پر گفتگو ہوئی۔