سوئٹزر لینڈ میں جلسہ عید میلادالنبیؐ کا انعقاد،سفیر پاکستان عامر شوکت اور پیر سید جعفرعلی شاہ سواتی کی بطور مہمان خصوصی شرکت

باصل(نمائندہ خصوصی)ماہ ربیع الاول ، مبارک اور سعادتوں بھرے مہینے کی آمد کے ساتھ ہی عاشقان رسول ﷺ کے اپنے نبی آخرالزمان حضور ﷺ کے ساتھ محبت اور عقیدتوں کے پھول اور نذرانے عقیدت پیش کرنے کیلئے سوئٹزر لینڈ کے شہر باصل میں زیر سر پرستی صاحبزادہ سید علی الاشرفی الجیلانی روحانی بابرکت اور نورانی محفل میلاد مصطفیٰ ﷺ کا انعقاد کیا۔

محفل میلاد النبی ﷺ میں مہمانان خصوصی سوئٹزرلینڈ میں سفیر پاکستان عامر شوکت اور پیر سید جعفر علی شاہ سواتی تھےمحفل کا آغاز تلاوت قرآن پاک سے کیا گیا۔جس کی سعادت سید علی جیلانی نے حاصل کی ۔

یورپ سے آئے ہوئے نامور ثناخوانوں جن میں سید زین جیلانی ،ریاض الدین ، ڈاکٹر خالد پنی، احمد ریاض الدین ، عمران مزمل ،محمود الحسن شاہ ،عبداللہ امبر جیلانی ،جنت فاطمہ، ملک پرویز، محمد ابراہیم، احد اشرف ،محمد علی اور مقید نے اپنے مخصوص انداز میں حضور ﷺ کے حضور گلہائےعقیدت کے پھول نچھاور کیے۔

پیر سید جعفر شاہ سواتی نے اپنی خوبصورت آواز میں نعت رسول ﷺ پڑھ کر محفل میلاد میں وجد کا سماں پیدا کر دیااور لوگوں کی آنکھیں اشکبار تھیں،سید علی جیلانی نے اپنے خطاب میں حضور ﷺ کی سیرت کو بیان کرتے ہوئے کہا اللّه پاک نے اپنے حبیب کو فرمایا آپ پریشان ناہوں ،قیامت تک ہم نےآپ ﷺ کا ذکر بلند فرما دیا اور آج دیار غیر میں یہ ہماری خوش قسمتی ہے ہم حضور ﷺ کا ذکر بلند کر رہے ہیں۔

سفیر پاکستان عامر شوکت نے خطاب کرتے ہوئے پوری ٹیم کا میلاد منعقد کرنے پر شکریہ ادا کیا اور کہا کہ آقا نے ہمیں زندگی گزارنے کا سلیقہ سکھایا، 1935میں انسانی حقوق سپریم کورٹ امریکہ نے ایک قرارداد پاس کی کہ دنیا کا سب سے بڑا قانون حضرت محمد مصطفیؐ نے دیاہماری تمام پریشانیوں کا حل حضور ﷺ کی سیرت میں چھپا ہوا ہے۔

ہم نے آج عهد کرنا ہے ہم نے حضور ﷺ کی سیرت پر عمل پیرا ہونا ہے۔ مقررین نے اپنے خطاب میں ایک ہی پیغام دیا، آج اس فتنے اور نفسا نفسی کی دنیا میں مسلمانوں کی بقا صرف حضور اکرم ﷺ کے اسوہ حسنہ اور ان کی سیرت پر عمل پیرا ہونے میں ہے،ہمیں حضور ﷺ کا دامن مضبوطی سے تھام لینا چاہیے۔

آخر میں درود و سلام پیش کیا گیا اور صاحبزادہ سیدعلی الاشرفی الجیلانی نےدعا کرائی ،محمد خان ،ذوالفقاراحمد خان، سجاد راجہ، فیاض خالد گوجر محمد اختر نے تمام مہمانوں کا شکریہ ادا کیا،مہمانوں کی تواضح لنگر محمدی سے کی گئی۔