تقریب کا اہتمام بہروزعلی خان نے اپنے آفس میں کیا
پرانے دوستوں کی محفلیں سجایا کرو کہ یہ محافل آپ کو بوڑھا نہیں ہونے دیتیں
دبئی کی یادیں، گپ شپ اور بہترین ذائقہ دار کھانے اس تقریب کا حصہ تھے
دبئی (طاہر منیر طاہر) ایکس الفطیم فرینڈز گروپ کی دوستانہ محفل بہروز علی خان کے آفس میں منعقد ہوئی۔ اس پر جوش اور فرینڈلی نشست میں کینیڈا سے تشریف لائے ہوئے الفطیم فرینڈز گروپ کے ساتھی سردار عالم، شیخ محمد پرویز، میزبان بہروز علی خان، سلمان جعفری، محمود خان، محمد صالحین، عطا الرحمن شریک ہوئے جبکہ اس محفل میں آن لائن چئیرمین الفطیم گروپ محمد یوسف اور افتخارحیات افتخار Alf Gamasco نے شرکت فرمائی۔
محفل میں شعر و ادب، لطیفے، بیتے ہوئے 1980 سے 2010 اور پرانے دوستوں کی شرارتیں، پرانے دوستوں کے قصے، یاد ماضی کے دریچے اور بھولی بسری یادوں پر گفتگو ھوئی دوستوں کی خوشیاں قابل دید تھیں شاعر نے کیا خوب کہا ہے، یاد ماضی عذاب ہے یارب اور دانش وروں نے کیا خوب کہا ہے کہ پرانے دوستوں کی محفلیں سجایا کرو کہ یہ محافل آپ کو بوڑھا نہیں ہونے دیتیں۔
واقعی ماحول ایسا ہی تھا کہ ہر جانب قہقہے پھبتیاں چہروں پر مسکراہٹیں، الفطیم کمپنی کے قصے، دبئی کی یادیں اور گپ شپ میں کئی گھنٹے گزر گئے، 70 سے 80 سال کے لڑکے مسلسل خوش گپیوں میں مصروف تھے کہ شاہی دسترخوان سے کھانوں کی دھیمی دھیمی خوشبوئیں ماحول اور معطر کرنے لگیں۔
اسی اثناء بہروز بھائی نے کھانے کی دعوت دی اور تمام دوست کھانوں سے لطف اندوز ہونے لگے کھانوں کی بہترین کولیکشن اور کھانوں کے ذائقے کمال تھے، محفل کا اختتام دلفریب مسکراہٹوں گروپ فوٹوز اور معانقوں سے ہوا، محفل میں الفطیم فرینڈز ان تمام دوستوں کا ذکر بھی ہوا جو موجود بھی نہ تھے اور اعلان ہوا کہ جلد ہی سالانہ کانفرنس کا انعقاد کیا جائے گا۔ انشاءاللہ