دبئی ایکسپو 2020،بیلجیئم کی وزیر خارجہ صوفی ولمس کا پاکستانی پویلین کا دورہ،تجارتی تنظیم PABOCCIکا خیر مقدم
برسلز(نمائندہ خصوصی)بیلجیئم کی وزیر خارجہ صوفی ولمس نے دبئی میں جاری ایکسپو 2020 میں لگے ہوئے پاکستانی پویلین کا دورہ کیا۔
اس موقع پر انہوں نے سارے پویلین کا وزٹ کیا اور وہاں دی جانے والی پاکستان کے متعلق بریفنگ کو انتہائی دلچسپی سے سنا۔
انہوں نے وہاں پیش کی جانے والی پاکستان سے متعلق ڈاکو مینٹری کا بھی ملاحظہ کیا اور اسے پاکستان کی اچھی مارکیٹنگ قرار دیا۔
پاکستان میں موجود بیلجیئم کے سفارت خانے نے بیلجئین وزیر خارجہ صوفی ولمس کی پاکستان پویلین میں آمد پر پاکستانی حکام کی جانب سے پرتپاک استقبال پر پاکستانی وزارت خارجہ اور وہاں موجود حکام کا شکریہ ادا کیا ہے۔
دوسری جانب یورپین اور بیلجیئم کے دارالحکومت برسلز میں قائم اوورسیز پاکستانیوں کی تجارتی تنظیم پاک-بینیلکس اوورسیز چیمبر آف کامرس اینڈ انڈسٹری نے بیلجئین وزیر خارجہ کے اس دورے کا خیر مقدم کرتے ہوئے اسے دونوں خطوں کے درمیان بڑھتے ہوئے تجارتی اور ثقافتی تعلقات کی مضبوطی کی علامت قرار دیا ہے۔