انتہائی معزز و محترم قارئین کرام سب سے پہلے تو میرپور انٹرنیشنل ائرپورٹ ڈیمانڈ گروپ کے تمام مخلص ممبران کا شکریہ ادا کرنا ہے کہ وہ اوورسیز ورکرز کے اس دیرینہ جائز مطالبے کو جس احسن طریقے سے لیکر آگے بڑھ رہے ہیں وہ سراہے جانے کے قابل ہے اور بجا طور پر یہ توقع کی جا سکتی ہے کہ اس معاملے کو سیاست سے پاک و صاف رکھا جائے گا اور ایسے پیشہ ور سیاستدانوں یا ان کی اولادیں جو اپنے مقاصد کے لیے بڑی منظم تحریکوں کو ہائی جیک کرنے کی مہارت رکھتے ہیں سے بچا کر رکھا جائے گا۔
یہ خوش آئند بات ہے کہ پاکستان ایوی ایشن اتھارٹی فیزیبلٹی رپورٹ جو آج سے چودہ سال پہلے تیار ہو چکی تھی اور جس کے نتیجے میں لہڑی کے قرب و جوار میں ساڑھے آٹھ ہزار کنال رقبے کی نشاندہی بھی ہو چکی تھی اس پر پھر سے غور و خوض ہو رہا ہے ۔ اس میں کوئی شک بھی نہیں ہے کہ دنیا بھر میں کسی بھی بڑے پراجیکٹ کے شروع کرنے سے پہلے تین بنیادی چیزوں کی جانچ پڑتال ضروری ہوتی ہے اور وہ ہیں تکنیکی ، قانونی اور کاروباری اولالذکر پہ سن 1911 میں تفصیلی کام ہو چکا ہے۔
دوسرا مرحلہ قانونی اعتبار سے دنیا بھر کا یہ قانون ہے کہ جو بھی پراجیکٹ مفادِ عامہ کا ہو اس کے لیے لوگوں کے ملکیتی رقبے بھی حکومتِ وقت دس فیصد اضافی رقم دے کر C P O Compulsory Purchase Orderکے تحت خرید سکتی ہے، رہی تیسری کاروباری بات تو میر پور پورے آزاد کشمیر اور پاکستان کا وہ واحد ڈسٹرکٹ ہے جس کی آدھے سے زیادہ آبادی بیرونِ ملک مقیم ہے۔
علاوہ ازیں آزاد کشمیر کے لاکھوں کی تعداد میں محنت کش برطانیہ ، یورپ، امریکہ مڈل ایسٹ اور دنیا کے دیگر ممالک میں آباد ہیں جن کے اپنے خاندانوں اور عزیز و اقارب کے ساتھ قریبی روابط ہیں اور ان کا ہر خوشی غمی اور دیگر مواقعوں پہ آنا جانا تواتر سے رہتا ہے اور ائر سروسز تو ہمیشہ ہی سے کاروباری ہوتی ہیں اور وہ تو منافع بخش روٹس کی تلاش میں رہتی ہیں اس لیے اس ائر پورٹ سے سکردو ، راولاکوٹ ، مظفر آباد اور ملک کے دوسرے شہروں تک ڈومیسٹک اور کارگو سروس شروع کر کے اسے فضا ئی رابطوں کا حب بنایا جا سکتا ہے۔
راقم کو گزشتہ سال اپنے کچھ دیگر دوستوں کے ہمراہ بغرض سیر و سیاحت البانیہ جانے کا اتفاق ہوا اور یہ جان کر خوشی ہوئی کہ وہاں کی حکومت اپنی ملکی ائر لائنز کو سبسیڈیز کرتی ہے کہ سستے ترین ٹکٹوں پہ مسافروں کو ملک میں لائو، چنانچہ صرف چونتیس 34 پونڈ میں انگلینڈ سے البانیہ کے ریٹرن ٹکٹس دستیاب ہیں اور وہاں دارالحکومت میں تیرانہ جھیل کا رقبہ منگلا جھیل کے دسویں حصے سے بھی کم مگر وہاں جتنے سیاح ہم نے ایک ہفتے میں دیکھے پاکستان اور آزادکشمیر میں پورے سال میں اتنے سیاح نہیں آتے جو زرِمبادلہ کمائے جانے کا موثر ترین ذریعہ ہے ۔
آجکل دنیا میں ٹورازم ملٹی ٹریلن انڈسٹری کا روپ دھار چکی ہے ،یہ انٹرنیشنل ائر پورٹ میر پور ، آزادکشمیر اور نادرن ایریاز ٹورازم میں خاطر خواہ اضافے کا باعث ہونے کے ساتھ ساتھ فارن انویسٹر کے لیے باعث اطمینان اور بہتر کاروبار اور روزگار مہیا کریگا ۔
مڈلینڈ اور برطانیہ میں بسنے والے زیادہ سے زیادہ لوگوں سے گزارش ہے کہ اپنے عزیز و اقارب اور دوست احباب کے ساتھ مورخہ 13 اپریل بروز اتوار بوقت پانچ بجے بعد دوپہر برمنگھم تشریف لا کر ا ئرپورٹ ڈیمانڈ کمیٹی کی حوصلہ افزائی فرمائیں اور اپنی مثبت تجاویز سے بھی نوازیں تاکہ انہیں چارٹر آف ڈیمانڈ میں بھی شامل کروایا جا سکے ۔اللہ پاک آپ سب کا حامی و ناصر ہو ۔ آمین ثمہ آمین ۔