فرانس پاک انٹرنیشنل رائیٹرز فورم کے زیر اہتمام ذائقہ ریسٹورنٹ میں نعتیہ میلاد شریف کا انعقاد،خواتین کی بھرپور شرکت
پیرس (سلطان محمود )ذائقہ ریسٹورنٹ میں فرانس پاک انٹرنیشنل رائیٹرز فورم کے زیر اہتمام ولادت مصطفی صلی اللہ علیہ وسلم کی شان میں ایک نعتیہ میلاد شریف کا انعقاد ہوا جس میں خواتین کی بڑی تعداد نے شرکت کی ۔
اس پروگرام کو فرانس کی معروف سماجی شخصیت محترمہ روحی بانو نے آرگنائز کیا جس کی صدارت معروف شاعرہ و مصنفہ شاز ملک نے کی،اس باوقار تقریب کی مہمان خصوصی قائم مقام سفیر پاکستان پیرس کی اہلیہ محترمہ حمیرا قاضی امجد عزیز تھیں۔
پروگرام کا باقاعدہ آغاز اللہ تعالی کے بابرکت نام سے ہو اجس کی سعادت زویہ عمر کو حاصل ہوئی،ندا عمر نے حمد باری تعالیٰ پیش کیا ۔
نیناں خان ، صف اول کی نعت خواں ادارہ منہاج القران انٹرنیشنل فرانس کی سابقہ صدر ستارہ ملک شمیم خان ، معروف شاعرہ اور کالم نگار ممتاز ملک ، آصفہ ہاشمی سینئر رہنما پی ٹی آئی فرانس، ناصرہ خان سینئر صحافی ، شمیم ظہور سماجی کارکن ،غزالہ یاسمین سماجی کارکن ، فردوس ، ثریا ارشد ، سعدیہ شاہ ، ناہید ، آفرین ، سمیرا سنیعہ ، شیمی ، اقرا ، مہک اور غزالہ نے ہادی بر حق محمد مصطفی صلی اللہ علیہ وسلم کے حضور گلہائے عقیدت پیش کئے۔
مہمان خصوصی حمیرا قاضی امجد عزیز نے بہت خوبصورت انداز میں رسول مقبول صلی اللہ علیہ وسلم کے اسوہ حسنہ پر روشنی ڈالتے ہوئے نبی پاکؐ کی حیات طیبہ کو مشعل راہ بنانے پر زور دیا ۔اس کے بعد والنسیہ کی معروف عالمہ نازیہ نے شان مصطفیؐ پر ایمان افروز بیا ن دیا ۔
فرانس پاک انٹرنیشنل رائیٹرز فورم کی صدر شاز ملک نے اپنے صدارتی خطاب میں کہا کہ ایسی روحانی محفلوں کا اہتمام ہونا چا ہئےاور میں نے اپنے فورم کا آغاز بھی سرور کونین محمد مصطفی صلی اللہ علیہ وسلم کی مقدس محفل سے کیا ہے انہوں نے تمام شرکا کا شکریہ ادا کیا ۔
اس کے بعد پروگرام کی آرگنائزر روحی بانو نے ملکی سلامتی خوشحالی اور کورونا وائرس سے نجات کے لئے دعا خیر کی، آخر میں مہمان خصوصی حمیرا قاضی امجد عزیز نے ایس ایم ٹیکسٹائل کی جانب سے تمام مہمانا ن گرامی اور نعت خواں بچیوں اور خواتین میں دوپٹے ،تسبیحاں اور جائے نماز تقسیم کیں۔
یوں درود و سلام کی صدا ئوں میں یہ پروقار اور ایمان افروز تقریب فرانس پاک انٹرنیشنل رائیٹرز فورم کے سر پرست اعلیٰ ملک محمد سید کے دیئے گئے شاندار عشا ئیہ کے ساتھ اختتام پذیر ہوئی۔