پیرس (سلطان محمود سے) پیرس میں بھارتی وزیراعظم کا ’’مودی دہشت گرد‘‘ کے نعروں سے استقبال،بھارتی وزیر اعظم نریندر مودی کی پیرس آمد پر پاکستانی اور کشمیری کمیونٹی سڑکوں پر نکل آئی، شدید احتجاج کیا اور نریندر مودی کے خلاف نعرے بازی کی، مظاہرین کا کہنا تھا کہ مودی قاتل کا دنیا کے ہر کونے میں پیچھا کریں گے۔
فرانس کے دارالحکومت پیرس کی فضا آزادی کشمیر کے نعروں سے گونج اٹھی، اس موقع پر مظاہرین نے اپنے ہاتھوں میں کشمیر اور پاکستان کے جھنڈے اور بھارت مخالف نعروں والے کتبے اٹھا رکھے تھے۔ مظاہرین نے مودی اور انڈیا کے خلاف شدید نعرے بازی بھی کی ۔
ریلی کے شرکاء نے مودی ٹیرورسٹ، انڈیا ٹیرورسٹ، ہم کیا چاہیں آزادی ،کشمیر ی مانگیں آزادی، لے کے رہیں گے آزادی ،ہے حق ہمارا آزادی، کشمیر بنے گا پاکستان ،کے فلک شگاف نعرے لگائے۔
مظاہرین نے خطاب کرتے ہوئے کہا کہ دہشت گرد مودی نے مقبوضہ کشمیر کو دنیا کی سب سے بڑی جیل بنادیا ہے ، لیکن اقوام عالم سورہی ہے ، مقبوضہ کشمیر میں انسانی حقوق کی کھلم کھلا خلاف ورزی ہو رہی ہے۔
مقبوضہ کشمیر میں بھارت مسلسل ظلم و جبر کے پہاڑ توڑ رہا ہے ، کشمیریوں کی پر امن اور جمہوری جدوجہد کو روکنے کے لئے طاقت کا بے دریغ استعمال کیا جارہا ہے لیکن اس کے باوجود بھارت کی قابض فوج کے سامنے کشمیری ڈٹے ہوئے اور دنیا سے مطالبہ کر رہے ہیں کہ کشمیر میں استصواب رائے کروایا جائے جس کا وعدہ اقوام متحدہ کی قراردادوں کی شکل میں دنیا نے ان سے کر رکھا ہے۔
مظاہرے میں سیاسی ، سماجی و مذہبی جماعتوں کے نمائندوں نے بھی بھرپور شرکت کی۔
