لندن(نمائندہ خصوصی)کنزرویٹو پارٹی کے کونسلر اور معروف سیاسی و سماجی شخصیت قیصر عباس گوندل لیبر پارٹی کے امیدوار کو ہرا کرتھرک کونسل کے ڈپٹی میئر منتخب ہو گئے ہیں۔ وہ اس کونسل سے منتخب ہونے والے پہلے پاکستانی نژاد مسلمان ڈپٹی میئر ہیں۔
کونسلر قیصر عباس گوندل پہلی دفعہ 2018 میں لیبر پارٹی کی طرف سے کونسلر منتخب ہوئے اور 2022 میں لیبر پارٹی کی پالیسیوں سے اختلافات کی وجہ سے مستعفی ہو کر کنزرویٹو پارٹی کو جوائن کر لیا اور اُسی سال مئی میں ہونے والے انتخابات میں لیبر پارٹی کے امیدوار کو اُن کے محفوظ حلقے سے شکست دے کر دوبارہ کونسلر منتخب ہو گئے۔
ان کی سیاسی، تعلیمی اور سماجی تجربے کیوجہ سے 2022 میں ہی ان کو کیبنٹ ممبر فار کلچرو کمیونٹیز تعینات کر دیا گیا اور بعد میں کمیونٹی سیفٹی ڈیپارٹمنٹ کا اضافی پورٹفولیو بھی ان کو دے دیا گیا۔ پچھلے چند سالوں کے مختصر عرصہ میں انہوں نے بے شمار کام کئے اور کمیونٹیز کو اکٹھا کرنے میں اپنا کردار ادا کیا۔
انہوں نے اپنی کونسل میں مسلمانوں اور نیپالیوں کے لیے علیحدو قبرستان، مسلمانوں کے لئے مفت فیونرل سروس، ہندو، تامل اور کینیا کمونٹیز کے مذاہب کے لئے پریئر سروس ، مسلمان بچوں کے لئے سکولوں میں حلال کھانوں، بوسنینز مسلمانوں کے قتل عام کی یاد گار، لائبریری میں بارکلیز بنک اور سیٹیزنز ایڈوائس کا اجرا اور ساٹھ سے زائد مذہبی، سماجی و رفاعی آرگنائشنز کے نمائندوں سے ملاقا تیں کر کے ان کے مسائل ترجیحی بنیادوں پر حل کرنے سمیت متعدد کامیاب منصوبوں کا آغاز کیا۔
کونسلر قیصر عباس گوندل برٹش پاکستانی کونسلرز فورم ساؤتھ انگلینڈ کے جنرل سیکرٹری اور پنجاب بار کونسل کی فارن آفئیرز کمیٹی کے سیکرٹری بھی ہیں۔ ان کو ان کی سیاسی و سماجی خدمات کے اعتراف میں بی بی سی سمیت متعدد تنظیموں اور میئرز کی جانب سے ایوارڈز بھی مل چکے ہیں۔
ان کا تعلق پاکستان کے ضلع منڈی بہاؤالدین کے معروف سیاسی گھرانے سے ہے۔ ان کے والد چوہدری محمد عنائت گوندل پی پی پی کے بانی رکن اور ضلعی فنانس سیکرٹری، تحریک انصاف گجرانوالہ ڈویژن کی ممبرز کمیٹی کے چئیرمین اور تحصیل امن کمیٹی کو وائس چئیرمین رہ چکے ہیں اور ان کے چھوٹے بھائی فیصل گوندل تحریک انصاف یوتھ ونگ پنجاب کے وائس صدر اور اوورسیز کمیشن پنجاب کے ممبر سمیت مختلف عہدوں پر کام کرچکے ہیں۔