سوئٹزرلینڈ :منہاج القرآن انٹرنیشنل کے زیراہتمام سیرت النبی ﷺ کانفرنس کا انعقاد، پاکستانی فیملیز کی کثیر تعداد میں شرکت
یورپ بھر سے عاشقان مصطفیٰ ﷺ ، ثنا خوانوں سمیت برطانیہ سے نوجوان اسکالر علامہ ہارون عباسی الازہری کی بطور مہمان خصوصی شرکت
زیورخ (انصر اقبال بسراء) منہاج القرآن انٹرنیشنل سوئٹزر لینڈ کے زیر نگرانی عالمی سالانہ سیرت النبی ﷺ کانفرنس کا شاندار انعقاد کیا گیا ،کانفرنس میں یورپ بھر سے مفتیان اور ثناخوانوں نے بھرپور شرکت کی۔
محفل کا آغاز حسب معمول ذکر الٰہی قرآن پاک کی تلاوت سے کیا گیا جس کی سعادت خادم القرآن قاری حبیب نقشبندی نے حاصل کی۔ آپ نے اپنی خوبصورت آواز میں قرات فرما کر محفل میں حو کا عالم طاری کر دیا اور ہر طرف سبحان اللّه کی صدائیں بلند تھیں ۔
مقامی اور یورپ سے آئے ہوئے ثناخوانوں نے حضور ﷺ کے بارگاہ میں عقیدت کے پھول نچھاور کئے، کانفرنس درود و سلام سے گونج اٹھی، بچوں نے بھی اپنے اپنے انداز میں قرآن پاک کی تلاوت ،ثنا خوانی اور تقاریر کیں، حسنین قادری اور عمران مزمل نے نقابت کے فرائض انجام دیے۔
منہاج القرآن برطانیہ سے خصوصی طور پر آئے ہوئے جامعہ الازہر سے فارغ التحصیل نوجوان اسکالر علامہ ہارون عباسی الازہری نے فکر انگیز اور روح پرور خصوصی خطاب فرمایا اور دیار غیر میں بسنے والوں کو ایک ہی پیغام دیا سیرت النبی ﷺ کا دامن تھام لیں قرآن کا مطالعہ کریں اور حضور ﷺ کی سیرت کو اپنا معمول بنا لیں۔
آج مسلمانوں پر زوال کی وجہ دین سے دوری اور اپنے نبی کی تعلیمات کو یکسر بھول جانا ہے،آج کے اس پر فتن دور میں اشد ضرورت ہے ،ہم سیرت النبی ﷺ کا مطالعہ کریں اور اس پر عمل پیرا ہوں۔
نماز مغرب کی ادائیگی کے بعد تاجدار کائنات حضور ﷺ پر درود و سلام کا نذرانہ پیش کیا گیا اور پوری امت مسلمہ اور منہاج القرآن سوئٹزر لینڈ کے دیرینہ ساتھی سعید اقبال قادری کے اچانک اس دنیا فانی سے رخصت ہو جانے پر فاتحہ خوانی اور دعا فرمائی۔
تمام احباب نے منہاج القرآن کے منتظمین کا بہترین پروگرام کروانے پر شکریہ ادا کیا جن میں قابل ذکر نام عمران مزمل ، ارشد سیٹھی اور دیگر ساتھی مہمانوں کی تواضح لنگر محمدی سے کی گئی۔