سوئٹزرلینڈ،23 مارچ یوم پاکستان کے موقع پر سفارتخانہ پاکستان برن میں پرچم کشائی کی پروقار تقریب کا انعقاد

برن ،سوئٹزرلینڈ (عمران مزمل سے)23 مارچ یوم پاکستان کے خصوصی موقع پر سفارتخانہ پاکستان برن میں پرچم کشائی کی پروقار تقریب کا انعقاد کیا گیا، تقریب میں پاکستانی کمیونٹی کی کثیر تعداد میں شرکت ۔

تقریب کا باقاعدہ آغاز تلاوت قرآن پاک سے کیا گیا، فرسٹ سیکرٹری سوئٹزرلینڈ صائمہ خان نے قومی ترانے کی دھن میں پرچم کشائی کی جس کے بعد صدر پاکستان آصف علی زرداری اور وزیراعظم پاکستان شہباز شریف کے پیغامات پڑھتے ہوئے کہا کہ آج تجدید عہد کا دن ہے ہم سب کو مل کر آج عہد کرنا ہو گا کہ ہم سب پاکستان کی تعمیر وترقی اور امن سلامتی کے لیے مل کر کام کرنا ہو گا اور پاکستان کی ترقی اور امن کا راستہ روکنے والوں کو نشانہ عبرت بنانے میں اپنا بھرپور کردار بھی ادا کرنا ہو گا۔

پاکستان مسئلہ کشمیر کا پرامن حل چاہتا ہے اور پاکستان ہر سطح پر کشمیریوں کی سفارتی اور اخلاقی مدد جاری رکھے گا ،صائمہ خان نے تقریب سے خطاب کرتے ہوئے مزید کہا کہ ہم سب اپنے ملک کے سفیر ہیں اور ہمارا فرض ہے ہم ملک کی بہتری کیلئے سب مل کر کام کریں۔

اس وقت پاکستان کو دہشتگردی جیسے بڑے چیلنجز جیسے مسائل کا سامنا ہے مگر آج ہم سب کو اس لعنت کو ختم کرنے کیلئے عہد کرنا ہو گا ۔

ہم سب کو ہر قسم کے اختلافات ختم کر کے پاکستان کے موجودہ مسائل کو حل کروانے میں اپنا کردار ادا کرنا ہو گا۔ تقریب کے آخر میں پاکستان کے امن اور سلامتی کے لیے خصوصی دعا فرمائی گئی۔