ہم سب کو اختلافات ختم کر کے پاکستان کے مسائل کو حل کروانے میں اپنا کردار ادا کرنا ہو گا،سفیر پاکستان بلال احمد

23 مارچ یوم پاکستان کے موقع پر پرمننٹ کمیشن آف پاکستان ٹویونائیٹڈ نیشن جنیوا میں پرچم کشائی کی تقریب ، پاکستانی و ڈپلومیٹک کمیونٹی کی بھرپور شرکت

سوئٹزرلینڈ (عمران مزمل سے) 23 مارچ یوم پاکستان کے موقع پر پرمننٹ کمیشن آف پاکستان ٹویونائیٹڈ نیشن جنیوا میں پرچم کشائی کی باوقار تقریب کا انعقاد کیا گیا، تقریب میں پاکستانی اور ڈپلومیٹک کمیونٹی کی کثیر تعداد میں شرکت ۔

تقریب کا باقاعدہ آغاز تلاوت قرآن پاک سے کیا گیا، یو این جنیوا میں تعینات پاکستانی سفیر بلال احمد نے قومی ترانے کی دھن میں پرچم کشائی کی ،جس کے بعد یو این جنیوا میں تعینات کونسلر شاہ نظر نے صدر پاکستان آصف علی زرداری اور وزیراعظم پاکستان شہباز شریف کے پیغامات پڑھتے ہوئے کہا کہ آج تجدید عہد کا دن ہے ہم سب کو مل کر عہد کرنا ہو گا کہ ہم سب پاکستان کی تعمیر وترقی اور امن و سلامتی کے لیے مل جل کر کام کرنا ہو گا اور پاکستان کی ترقی اور امن کا راستہ روکنے والوں کو نشانہ عبرت بنانے میں اپنا بھرپور کردار بھی ادا کرنا ہو گا۔

پاکستان مسئلہ کشمیر کا پرامن اور دیرپا حل چاہتا ہے اور کشمیریوں کی آزادی تک پاکستان ہر سطح پر کشمیریوں کی سفارتی اور اخلاقی مدد جاری رکھے گا۔

سفیر پاکستان بلال احمد نے تقریب سے خطاب کرتے ہوئے مزید کہا کہ ہم یو این جنیوا میں پاکستان کو درپیش مسائل جن میں موسمی تبدیلیاں، انرجی، صاف پانی، بلوچستان کے امن کو خراب کرنے میں ملوث بیرونی طاقتوں کو دنیا کے سامنے ناصرف اٹھا رہے ہیں بلکہ ان کی روک تھام کے لئے مناسب اقدامات کرنے پر اپنا مقدمہ بھرپور طریقے سے لڑ رہے ہیں۔

ہم سب اپنے ملک کے سفیر ہیں اور ہمارا فرض ہے کہ ملک کی بہتری کیلئے سب مل کر کام کریں، ہم سب کو ہر قسم کے اختلافات ختم کر کے پاکستان کے موجودہ مسائل کو حل کروانے میں اپنا کردار ادا کرنا ہو گا۔

تقریب کے آخر میں پاکستان کے امن اور سلامتی کے لیے خصوصی دعا فرمائی گئی۔