سندھ فرینڈز فورم دبئی کی جانب سے سماجی کردار ڈاکٹر برکت نوناری کے اعزاز میں عشائیہ تقریب کا انعقاد
تقریب میں اللہ نواز میمن،ڈاکٹر مجیب میمن،انجینئر فہد نظامانی،منصور لغاری،دیدار کلہوڑو اور اللہ بخش کلہوڑوکی شرکت
ڈاکٹربرکت نوناری اپنی قوم اور وطن سے بے لوث محبت کرنے والی شخصیت ہیں،بشیر آریسر
ڈاکٹر برکت نوناری کو اعزازی شیلڈ پیش کرنے کے ساتھ اجرک بھی پہنائی گئی
دبئی (طاہر منیر طاہر) سندھ کے دور دراز علاقوں میں سندھ فرینڈز فورم کے تعاون سے طبی کیمپس کا اہتمام کرنے اور پچاسہزار سے زائد مریضوں کو مفت علاج و ادویات فراہم کرنے والے سندھ کے سماجی کردار ڈاکٹر برکت نوناری کو خراج تحسین پیش کرنے کے لئے دبئی کے ایک ریستوران میں استقبالیہ و عشائیہ تقریب منعقد کی گئی۔
دبئی کے علاقہ الورسان میں منعقدہ تقریب میں متحدہ عرب امارات کی سماجی شخصیات اللہ نواز میمن، ڈاکٹر مجیب میمن، انجینئر فہد نظامانی، منصور لغاری، دیدار کلہوڑو اور اللہ بخش کلہوڑو سمیت متعدد لوگوں نے شرکت کی۔
تقریب میں صحافیوں کو بھی مدعو کیا گیا تھا جن میں سارنگ،اسحاق سومرو اور مجیب میرانی سمیت مختلف نشر و اشاعت کے اداروں سے وابستہ صحافی شامل تھے،تقریب میں موجود لوگوں نے ڈاکٹر نوناری کی خدمات کا اعتراف کرتے ہوئے انہیں خراج تحسین پیش کیا۔
اس موقع پرکمپیئرنگ کے فرائض اختر شیخ نے جبکہ مہمانوں کا شکریہ فورم آرگنائیز انجینئر پدم ویر اور فہد ابڑو نے ادا کیا۔ تقریب کے مہمانوں سے خطاب کرتے ہوئے سندھ فرینڈز فورم کے کنوینر بشیر آریسر نے کہا کہ ڈاکٹر برکت نوناری اپنی قوم اور وطن سےبے لوث محبت کرنے والی شخصیت ہیں جنہوں نے بدین، کاچھو، سپریو بند سے لے کر سانگہڑ تک کے دشوار اور کٹھن راستوں کو عبور کرتے ہنگامی بنیاد پر اپنی ٹیم کے ساتھ لوگوں کی خوراک، ادویات سمیت ہر ممکن طبی خدمت فرض سمجھ کر کی ہے۔
میزبانوں کی جانب سے ڈاکٹر برکت نوناری کو اعزازی شیلڈ پیش کرنے کے ساتھ اجرک بھی پہنائی گئی جبکہ فورم آرگنائیزرس چتر ویر، عامر تالپور، صابر اور سراج شیخ نے تقریب کے انتظام بطریق احسن ادا کئے۔