سفارت خانہ پاکستان ابو ظہبی میں مختلف شعبوں میں کامیابی حاصل کرنیوالی شخصیات کے مضامین کے مجموعہ پر مشتمل کتاب کی تقریب رونمائی

پاکستانی مصنفین خاص طور پر بیرون ملک رہنے والے پاکستانیوں کے لئے شدید جذبات اور گہری محبت رکھتے ہیں

کتاب کی تقریب رونمائی میں ادبی شخصیات، سفارت کاروں اور پاکستانی کمیونٹی کےلوگوں نے شرکت کی

صباح کریم خان کی مرتب کردہ کتاب Home its complicated کی زبردست پذیرائی

دبئی (طاہر منیر طاہر سے) پاکستان کے مشہور ادیبوں، مفکرین ، ڈاکٹروں، فلم سازوں، صحافیوں سمیت مختلف شعبوں میں کامیابی حاصل کرنے والی شخصیات کے مضامین کے مجموعہ پر مشتمل کتاب کی تقریب رونمائی گزشتہ روز یہاں پاکستانی سفارت خانہ میں منعقد ہوئی۔

"ہوم اٹس کمپلیکیٹیڈ” (Home its complicated) کے عنوان سے کتاب کی تقریب رونمائی میں کئی ادبی شخصیات، سفارت کاروں اور پاکستانی برادری کے سرکردہ افراد نے شرکت کی۔ ابوظہبی میں پاکستان کے سفیر فیصل نیاز ترمذی بھی اس موقع پر موجود تھے۔

پینلسٹس میں زین سعید، امبر ظفر خان اور صبا کریم خان شامل تھے جبکہ خرم کوریش نے تقریب کی نظامت کے فرائض انجام دئیے ۔ خالد انعم، عمر شاہد حامد، اویس خان، علی خان، محمد علی بندیال سمیت پاکستان کے مشہور ادیبوں، مفکروں، ڈاکٹروں، فلم سازوں، صحافیوں اور مختلف شعبوں میں کامیابی حاصل کرنے والے افراد کے مضامین کے مجموعہ پر مشتمل کتاب کو صباح کریم خان نے مرتب کیا ہے۔اس موقع پر پینل مباحثہ میں کتاب کے مختلف پہلوؤں پر روشنی ڈالی گئی۔

مباحثے کے شرکا نے اس بات پر زور دیا کہ مختلف پاکستانی مصنفین خاص طور پر بیرون ملک رہنے والے پاکستانیوں کے لئے شدید جذبات اور گہری محبت رکھتے ہیں۔کتاب میں اس بات کا اظہار کیا گیا ہے کہ پاکستان 24 کروڑ سے زائد لوگوں کا گھر ہے، 70 ، 80 زبانیں اور دلکش قدرتی تنوع کو بریکنگ نیوز ٹکر یا خبر کی سرخی تک محدود نہیں کیا جا سکتا۔

سفیر فیصل نیاز ترمذی نے تقریب کے شرکا کا شکریہ ادا کیا۔ انہوں نے پڑھنے کے لائق کتاب مرتب کرنے میں پینلسٹس کے تعاون کو زبردست خراج تحسین پیش کیا۔