لندن(سدرہ بھٹی)خواتین کے عالمی دن کے موقع پرایسٹ لندن میں نائب صدرپاکستان پیپلز پارٹی یوکے ویمن ونگ شگفتہ نسرین کی جانب سے تقریب کا انعقاد کیا گیا جس میں خواتین کی کثیر تعداد نے شرکت کی۔
اس موقع پر شگفتہ نسرین کا کہنا تھا کہ خواتین اپنے آپ کوڈویلپ کریں، اپنی سکلز کو بڑھائیں، انہوں نے مزید کہا کہ ہمارے پاس محترمہ فاطمہ جناح اور محترمہ بے نظیر بھٹو شہید جیسی کامیاب خواتین کی مثالیں ہیں،ابھی خواتین کو اپنے حقوق حاصل کرنے کیلئے بہت آگے جانا ہے۔
ابھی یورپ سمیت دنیا میں بہت سی جگہ پر خواتین کو مشکلات درپیش ہیں جس کے لئے ہم سب نے کام کرنا ہے، انہوں نے کہا کہ میری سب بہنوں سے درخواست ہے کہ اپنے آپ کو کسی سے کم تصور نہ کریں اور اپنی تعلیم پر توجہ دے کر خود کو اپنے پائوں پر کھڑا کریں۔
تقریب میں شرکا نے کہا کہ ہم اپنا کردار بخوبی ادا کر رہی ہیں ،اس بات پر بھی زور دیا گیا کہ خواتین چاہے جس شعبہ سے بھی تعلق رکھتی ہوں ،ملک و قوم کی ترقی میں اپنا حصہ ضرور ڈالا کریں۔
تقریب کے آخر میں دعائیہ کلمات پڑھے گئے،ملک و قوم کیلئے دعا کی گئی اور کیک کاٹا گیا۔