برطانیہ سے آئی اوورسیز فیملی کو ائیرپورٹ سے گھر جاتےہوئے گن پوائنٹ پر لوٹ لیا گیا

اسلام آباد(ویب ڈیسک)سفید کرولا سوار مسلح ڈاکوؤں نے علی الصبح برطانیہ سے آئی اوورسیز فیملی کو ائیرپورٹ سے گھر جاتے گن پوائنٹ پر لوٹ لیا۔ گوجر خان پولیس کو اوورسیز خاتون سونیا عزیز نے بتایا کہ اپنے شوہر شاہین سلیم مرزا کے ہمراہ ائیرپورٹ سے گھر جارہے تھے کہ صبح چھ بجے بھائی خان گوجرخان کے قریب ایک سفید ایکس ایل آئی کار نے ہماری گاڑی کو روک لیا۔

متاثرہ خاتون کے مطابق سفید ایکس ایل آئی کار سے 3ڈاکو اترے جن میں سے 2مسلح تھے نے گن پوائنٹ پر ہم سے 2400پاؤنڈز،10تولے طلائی زیورات، آئی پیڈ، آئی فون، کپڑے، جوتے،گھڑی، میرا اور میرے شوہر کا پاسپورٹ، برطانوی کارڈ، شوہر کے اے ٹی ایم کارڈز، پسٹل لائسنس، اور میرا برطانوی ڈرائیونگ لائسنس چھین لیے اور موقع سے فرار ہوگئے۔

متاثرہ خاتون کے مطابق 3 ڈاکو ظاہری حلیہ سے 25/30 سال کی عمر کے لگتے تھے، جنہیں سامنے آنے پر پہچان سکتے ہیں۔گوجرخان پولیس نے واقعہ کا مقدمہ درج کرکے تفتیش شروع کردی ہے۔