باصل(نمائندہ خصوصی)سوئٹزر لینڈ کے شہر باصل کے مشہور پارک میں پاکستانی فیملیز کیلئے عید ملن پارٹی کا انعقاد کیا گیا۔
اس تقریب میں ہر فیملی اپنے ساتھ ایک لذیز کھانے کی ڈش بنا کر ساتھ لائی،عید ملن پارٹی میں خواتین کی طرف سے خوبصورت پاکستانی کپڑوں اور جیولری کے سٹال بھی لگائے گئے اور ساتھ ساتھ پاکستانی خواتین نے مہندی بھی لگوائی، مردوں اور بچوں کے درمیان کرکٹ میچ بھی کھیلا گیا۔
خواتین کے رنگ برنگے ملبوسات خاصی توجہ کا باعث بنے رہے۔ پاکستانیوں کا کہنا تھا آج کی عید ملن پارٹی اس وجہ سے بھی اہم ہے کہ ہم کافی مزے مزے کے کھانوں سے لطف اندوز ہوئے اور بہت انجوائے کیا۔
باصل میں مقیم پاکستانی کمیونٹی کا کہنا تھا اس طرح کی عید ملن پارٹی ہمارے لئے اس لئے بھی ضروری ہیں کہ ہم سب کو اکھٹے مل بیٹھنے کا موقع ملتا ہے اور ہمارے بچوں کے درمیان بھی روابط مضبوط ہوتے ہیں۔
تمام فیملیز نے ایک دوسرے کا شکریہ ادا کیا اور کمیونٹی کو مضبوط بنانے میں اپنے تعاون کی بھرپور یقین دہانی کروائی ۔
آخر میں پاکستانیوں میں علی جیلانی اور امبر جیلانی نے شاہدہ محمد خان کو خوبصورت پروگرام کو آرگنائز کروانے پر مبارکباد پیش کی اور خاص طور پرعنبرجیلانی کی طرف سے لگائے گئے خوبصورت سٹال کی بھی تعریف کی۔