پاکستان کے 76ویں یوم آزادی کے موقع پر سفارت خانہ پاکستان ابو ظہبی میں پرچم کشائی کی تقریب
تقریب میں پاکستانی کمیونٹی کے لوگوں اور فیملیزکی شرکت
پاکستان کی تعمیر و ترقی میں اپنا تعمیری کردار ادا کریں، فیصل نیاز ترمذی، سفیر پاکستان
پاکستان کے 76 ویں یوم آزادی کے موقع پردبئی سے اسکردو کے لئے بین الاقوامی پرواز خوش آئند ہے
دبئی (طاہر منیر طاہر) پاکستان کے 76ویں یوم آزادی کو قومی جوش و جذبے کے ساتھ منانے کے لیے سفارت خانہ پاکستان ابوظہبی میں پرچم کشائی کی تقریب کا انعقاد کیا گیا۔ تقریب میں پاکستانی کمیونٹی کے افراد کی بڑی تعداد نے اپنے اہل خانہ کے ساتھ شرکت کی۔ تقریب میں پاکستانی قیادت کے پیغامات پڑھ کر سنائے گئے۔
متحدہ عرب امارات میں پاکستان کے سفیر فیصل نیاز ترمذی نے مہمانوں کو خوش آمدید کہا اور پاکستان کے 76 ویں یوم آزادی پر مبارکباد دی۔ انہوں نے پاکستان کی سلامتی اور خوشحالی کے لیے دعا کی اور کمیونٹی کے افراد پر زور دیا کہ وہ پاکستان کی تعمیر و ترقی میں اپنا تعمیری کردار ادا کریں۔
متحدہ عرب امارات میں پاکستانی کمیونٹی کے کردار کا ذکر کرتے ہوئے، سفیر نے متحدہ عرب امارات کی ترقی میں ان کے کردار اور قومی معیشت کو سہارا دینے اور پاکستان اور یو اے ای کے درمیان تعلقات کو بہتر بنانے میں ان کے کردار کو سراہا۔ انہوں نے متحدہ عرب امارات کی قیادت کی پاکستان کے ساتھ خصوصی وابستگی کو خاص طور پر سراہا۔ انہوں نے کہا کہ دونوں ممالک دوطرفہ تعلقات کو مزید مضبوط بنانے کے خواہاں ہیں۔
سفیر نے پاکستان کے 76 ویں یوم آزادی کے موقع پر اسکردو کے لیے پہلی بین الاقوامی پرواز کو دبئی سے اڑان بھرتے ہوئے بھی خوشی کا اظہار کیا اور پاکستانی کمیونٹی اور اماراتیوں کی حوصلہ افزائی کی کہ وہ پاکستان کا دورہ کریں اور اس کی خوبصورتی کو دیکھیں۔
تقریب کے دوران پاکستان کمیونٹی سکولوں کے بچوں نے جوش و خروش سے قومی نغمے گائے۔