اوورسیز پاکستانی اپنے سرمائے کو پاکستان لا کر رئیل اسٹیٹ کے بزنس میں انوسٹمنٹ کو فروغ دیں،عبدالعلیم خان

پاکستان مشکلات کا شکار ضرور ہے مگر یہ مشکل وقت بھی گزر جائے گا،جدہ میں تقریب سے خطاب

جدہ(خالد نواز چیمہ)استحکام پاکستان پارٹی کے صدر اور ممتاز کاروباری شخصیت عبدالعلیم خان کا کہنا ہے کہ سرمایہ کاری کے حوالے سے پاکستان ایک موزوں ملک ہے جبکہ رئیل اسٹیٹ جدہ میں سرمایہ کاری کرنے والوں کے لئے وسیع مواقعے موجود ہیں ان خیالات کا اظہار انہوں نے سعودی عرب کے شہر جدہ میں ایک تقریب کے دوران کیا جس میں سینکڑوں افراد شریک تھے۔

جدہ کے مقامی ہوٹل میں منعقدہ تقریب کا مقصد اوورسیز پاکستانیوں کو پاکستان میں سرمایہ کاری اور کاروبار کو فروغ دینے کے حوالے سے راغب کرنا تھا ،تقریب میں اہم سعودی شخصیات سمیت پاکستانی کمیونٹی کے سینکڑوں افراد شریک تھے۔

اس موقعہ پر استحکام پاکستان پارٹی کے صدر اور ممتاز کاروباری شخصیت عبدالعلیم خان کا کہنا تھا کہ پاکستان مشکلات کا شکار ضرور ہے مگر مایوس ہونے کی ضرورت نہیں یہ مشکل وقت ہے جو گزر جائے گا اور بہت جلد پاکستان ترقی کی نئی منازل طے کرے گا۔

عبدالعلیم خان نے زور دیا کہ اوورسیز پاکستانی اپنے سرمائے کو پاکستان میں لائیں اور رئیل اسٹیٹ کے بزنس میں انوسٹمنٹ کو فروغ دیں اس سے ان کا سرمایہ بھی محفوظ ہوگا اور ان کے آگے بڑھنے کے وسیع مواقعے بھی موجود ہیں جبکہ غیر ملکی سرمایہ کاروں کے لئے بھی پاکستان ایک موزوں ملک ہے ۔

تقریب میں سعودی بینڈ نے روایتی ڈانس کرکے شرکاء کو خوب محظوظ کیا اور ان سے داد حاصل کی۔

تقریب کے دیگر مقررین میں فئیر ڈیل مارکیٹنگ کے سی ای او عبدالروف، فرید ذکاء باجوہ اور دیگر نے اظہار خیال کرتے ہوئے کہا کہ اوورسیز پاکستانیز ملک کا اثاثہ اور سرمایہ ہیں ہماری خواہش ہے کہ ان کے لئے اچھی ہا ئوسنگ سکیم اور رئیل اسٹیٹ کے بزنس کے حوالے سے مفید معلومات فراہم کریں تاکہ زیادہ سے زیادہ لوگ اپنا سرمایہ محفوظ بنا سکیں ممتاز اداکار ڈرامہ نگار سہیل چیمہ نے بھی شرکت کی۔