مانچسٹر میں ’’المصطفیٰ ویلفیئرٹرسٹ‘‘ کے زیر اہتمام فلسطین و غزہ کے مظلوم مسلمانو کیلئے فنڈ ریزنگ تقریب کا انعقاد

مانچسٹر(وسیم چودھری)مانچسٹر کے بڑے ہال ورملین Vermillion میں ’’المصطفیٰ ویلفیئر ٹرسٹ‘‘ کے زیر اہتمام فلسطین و غزہ کے مظلوم مسلمانوں کے لئے فنڈ ریزنگ تقریب منعقد ہوئی جس میں کویت سے معروف اسلامی سکالر ، خطیب اور قاری شیخ مشاری الراشد العفاسی نے اپنے منفرد انداز میں تلاوت قرآن پاک اور نوشید پڑھ کر محفل میں سماں باندھ دیا۔

تقریب میں سینکڑوں خواتین، بچوں ، بزرگوں سمیت ہر عمر کے افراد کی کثیر تعداد شریک ہوئی ،المصطفیٰ ویلفیئر ٹرسٹ کے چیئرمین حاجی عبدالرزاق ساجد نے افتتاحی خطاب کرتے ہوئے کہا کہ المصطفیٰ فلسطین کے مسلمانوں کے لئے خوراک، علاج، ادویات ،ہسپتالوں کی تعمیر، طبی آلات ، ایمبولینسوں کی فراہمی کے لئے سرگرم ہے اور مصر اور لبنان کے راستے امدادی سامان کی فراہمی جاری ہے۔

ڈائریکٹر پرگرام نثار احمد ، حسن جاوید، سسٹر ظہیرہ ، ثنا کا کہنا تھا کہ المصطفیٰ انٹرنیشنل ریڈ کراس کے ساتھ مل کر فلسطین میں امدادی سرگرمیوں میں مصروف ہے، مسلمانوں کو اپنی صفوں میں فرقہ واریت ختم کرناہو گی ،فلسطینی مسلمان انتظار میں ہیں کہ امت مسلمہ کب ان کی مدد کرے گی، المصطفیٰ واحد چیرٹی ہے جو مذہب اور سیاست سے بالا تر ہو کر فلاحی کاموں میں مصروف ہے، فلسطین کے مسلمان ہماری امداد کے منتظر ہیں۔

تقریب سے فراز یوسف ، میکائیل مالا سمیت دیگر نے خطاب کرتے ہوئے کہا کہ فلسطین کے مسلمان مصیبت میں مبتلا ہیں ،ہم غزہ کے مسلمانوں کو پیغام دینا چاہتے ہیں کہ مانچسٹر کے مسلمان ان کے ساتھ ان کی آواز سن رہے ہیں اور ان کے مصائب دیکھ رہے ہیں اور ان کی ہر ممکن مدد کریں گے، المصطفیٰ فلسطین میں خوراک، علاج، ادویات ، ہسپتالوں کی تعمیر، طبی آلات سمیت دیگر ہنگامی امداد کے منصوبوں پر کام کرے گی۔

شیخ مشاری الراشدالعفاسی نے مسجد اقصیٰ کی آزادی، غزہ کے مسلمانوں کی امدادکے لئے خصوصی دعا کی اور کہا کہ اللہ تعالی غزہ کے مسلمانوں کی عزت کی حفاظت فرمائے اور غزہ کی مدد فرمائے۔ اس موقع پر شرکا نے فلسطین کے لئے دل کھول کر عطیات دئیے،شیخ مشاری العفاسی 30 دسمبر کو لندن میں ہونے والی تقریب میں بھی شرکت کریں گے۔ تقریب میں برطانیہ بھر سے نوجوانوں سمیت خواتین اور بچوں نے بھرپور شرکت کی۔