جدہ:سعودی عرب میں مقیم کشمیری و پاکستانی کمیونٹی نے یوم یکجہتی کشمیر روایتی جوش و جذبے کیساتھ میں منایا
جدہ (خالدنواز چیمہ) سعودی عرب میں مقیم کشمیری اور پاکستانی کمیونٹی نے یوم یکجہتی کشمیر روایتی جوش و جذبے کے ساتھ جدہ کے پاکستان ہاؤس میں منایا ۔ تقریب میں صدر پاکستان، وزیراعظم پاکستان، وزیراعظم آزاد کشمیر اور پاکستان کے وزیر خارجہ کے خصوصی پیغامات شامل تھے۔
اس موقع پر مقررین میں معروف سعودی سکالر ڈاکٹر فیض عابدین، چیئرمین کشمیر کمیٹی جدہ مسعود احمد پوری اور اوورسیز جموں و کشمیر کمیٹی کے وقاص عنائت شامل تھے۔ مقررین نے 5 اگست 2019 کے بھارت کے غیر قانونی اور یکطرفہ اقدامات پر روشنی ڈالی اور اس بات پر زور دیا کہ کشمیر کو ایک قلعہ بند جیل میں تبدیل کرنے کے باوجود بھارت آزادی پسند کشمیری عوام کے ناقابل تسخیر جذبے کو شکست نہیں دے سکتا۔ انہوں نے بھارت سے مطالبہ کیا کہ وہ فوری طور پر IIOJK میں انسانی حقوق کی سنگین، منظم اور ریاستی سرپرستی میں ہونے والی خلاف ورزیوں کو روکے۔
قونصل جنرل آف پاکستان جناب خالد مجید نے اپنے خطاب میں سعودی قیادت کی جانب سے کشمیر کاز کے لیے مسلسل حمایت کرنے پر ان کی متعریف کی۔ انہوں نے اس اہم مسئلے کے بارے میں فعال طور پر آگاہی پیدا کرنے میں اسلامی تعاون تنظیم (OIC) کے کردار کی بھی تعریف کی۔ قونصل جنرل نے عالمی برادری اور اقوام متحدہ پر زور دیا کہ وہ اس بات کو یقینی بنانے کے لیے اپنا بھرپور کردار ادا کریں کہ کشمیری اپنے حق خود ارادیت کا استعمال کر سکیں۔
او آئی سی میں پاکستان کے مستقل نمائندے/ سفیر جناب سید محمد فواد شیر نے اس موقع پر خطاب کرتے ہوئے بھارتی فوج کے مظالم اور زمینی حقائق کو تبدیل کرنے کے لیے IIOJK خطے میں آبادیاتی تبدیلیاں مسلط کرنے کے بھارت کے منصوبوں پر روشنی ڈالی۔ انہوں نے اس بات پر زور دیا کہ عالمی برادری کو اقوام متحدہ کی قراردادوں کے مطابق کشمیری عوام کے لیے انصاف کو یقینی بنانے کے لیے اکٹھا ہونا چاہیے۔
بھارتی مقبوضہ کشمیر میں رہنے والوں کی حالت زار اور بھارتی فوج کی طرف سے انسانی حقوق کی سنگین خلاف ورزیوں کو اجاگر کرنے والی ایک دستاویزی فلم دکھائی گئی۔ شرکاء اور مقررین نے عالمی برادری اور اقوام متحدہ پر زور دیا کہ وہ کشمیر کے دیرینہ مسئلے کو حل کریں اور غزہ میں فلسطینیوں کی نسل کشی کو روکنے کے لیے فوری اقدامات کریں۔