فخر اقبال چوہدری اور طاہر اقبال چوہدری برادران کی والدہ کے انتقال پر وزیراعظم عمران خان کا اظہار تعزیت
لندن(تارکین وطن نیوز)پاکستان تحریک انصاف سکاٹ لینڈ کے مرکزی رہنما فخر اقبال چوہدری ‘ ممبر قومی اسمبلی طاہر اقبال چوہدری ‘ قمر اقبال چوہدری ‘ نصر اقبال چوہدری ‘ حافظ نذیر اقبال اور زاہد اقبال چوہدری سابق نائب صدر ایف پی سی سی آئی کی والدہ محترمہ کی وفات پر وزیر اعظم عمران خان نے گہر ے دکھ کا اظہار کرتے ہوئے مرحومہ کے لیے فاتحہ خوانی کی۔
وزیراعظم عمران خان نے کہا کہ بلاشبہ دنیا میں والدین بالخصوص ماں جیسی نعمت کا کوئی نعم البدل نہیں، اللہ تعالی فخر اقبال چوہدری برادران کو یہ صدمہ برداشت کرنیکا حوصلہ اور مرحومہ کو جنت الفردوس میں اعلیٰ مقام عطافرمائے۔
وزیر اعظم عمران خان نے طاہر اقبال چوہدری ممبر قومی اسمبلی اور نصر اقبال چوہدری سابق چیف وزارت منصوبہ بندی ‘ ترقی وخصوصی اقدامات سے ملاقات کے دوران نصر اقبال چوہدری کی بیٹی کنزہ نصر جو چند ماہ قبل برطانیہ میں ایک حادثہ میں اللہ کو پیاری ہو گئی تھی کے لیے بھی فاتحہ خوانی کی۔
وزیراعظم عمران خان نے کہا انکی ہمدردیاں سوگوران کیساتھ ہیں، اللہ تعالی انہیں صبر عطافرمائے۔ علاوہ ازیں برطانیہ میں پاکستانی نژاد برطانوی ممبران پارلیمنٹ ‘ سیاسی وسماجی رہنمائوں ‘ حکومتی اکابرین سمیت اوورسیز پاکستانیوں نے بھی فخر اقبال چوہدری اور طاہر اقبال چوہدری برادران کے ساتھ انکی والدہ کی وفات پر افسوس کا اظہار کرتے ہوئے مرحومہ کے لیے فاتحہ خوانی کی ہے ۔