ایکسپو سنٹر لاہور میں ہیلتھ انجینئرنگ اینڈ منرلز شو کا انعقاد ، 860غیر ملکی مندوبین کی شرکت

پاکستان میں (IT) اور (AI) کے میدان میں بے پناہ ٹیلنٹ موجود ہے، محمد شہباز شریف

وزیرِ اعلیٰ پنجاب مریم نواز اور وزیرِ اعلیٰ سندھ مراد علی شاہ کی کارکردگی لا جواب ہے،وزیر اعظم

پاکستان تمام ممالک کو ملک میں بلا خوف و خطر سرمایہ کاری کی دعوت دیتا ہے، وزیر اعظم محمد شہباز شریف

لاہور (سعدیہ عباسی سے) وزیر اعظم محمد شہباز شریف نے کہا ہے کہ پاکستان میں سرمایہ کاری کیلئے ماحول ساز گار ہے،جدید ٹیکنالوجی سے معاشی بہتری اور روز گار کے زیادہ مواقع حاصل ہو سکتے ہیں، دوست ممالک کو کان کنی سمیت مختلف شعبوں میں سر مایہ کاری کے مواقع فراہم کر رہے ہیں،پاکستان میں انفارمیشن ٹیکنالوجی اور مصنوعی ذہانت کے میدان میں بے پناہ ٹیلنٹ موجود ہے اور پاکستان ترقی و خوشحالی کی را ہ پر گامزن ہے ۔

وزیراعظم شہباز شریف نے ان خیالات کا اظہار ایکسپو سنٹر لاہور میں ہیلتھ انجینئرنگ اینڈ منرلز شو کی تقریب سے خطاب کرتے ہوئے کیا۔وزیر اعظم محمد شہباز شریف نے کہا کہ پاکستان میں سرمایہ کاری کے وسیع مواقع موجود ہیں، حکومت اندرونی و بیرونی سرمایہ کاروں کو تمام ممکنہ سہولیات فراہم کرنے کے لئے کوشاں ہے، ملک میں انفارمیشن ٹیکنالوجی اور مصنوعی ذہانت ( اے آئی) کے میدان میں بے پناہ ٹیلنٹ موجود ہے، جدید ٹیکنالوجی سے معیشت میں بہتری اور روز گار کے زیادہ مواقع حاصل ہو سکتے ہیں۔

پاکستان میں سرمایہ کاری بالخصوص معدنیات کے شعبے مشترکہ منصوبے شروع کرنے کے لئے تمام مذکورہ ممالک کو دعوت دیتے ہیں،کان کنی اور معدنیات کے شعبے میں مشترکہ منصوبے شروع کرنے کا بہترین موقع ہے ۔ وزیرِ اعظم نے کہا کہ پاکستان کی آبادی 60 فیصد سے زائد نوجوانوں پر مشتمل ہے،ہمارے نوجوان ذہین ، قابل اور بے پناہ صلاحیتوں کے مالک ہیں، ہمارے نوجوان خود کو جدید تکنیک اورپیشہ وارانہ تربیت سے آراستہ کر رہے ہیں ۔

انہوں نے کہا کہ موجودہ حکومت کی دن رات محنت اور مثبت پالیسیوں کی بدولت پاکستانی برآمدات میں اضافہ ہو رہا ہے، ہم نے ان پروڈکشنز سے چھٹکارا حاصل کرلیا ہے جو مصنوعات ہمیں بیرونی ممالک سے در آمد کرنی پڑتی تھیں،کان کنی اور دیگر معدنیات میں پاکستان مالا مال ہے، ہمیں جدت ، تحقیق اور ترقی کی طرف جانا ہے اور عصر حاضر کی جدید ٹیکنالوجی سے استفادہ کر کے پاکستان ان شعبوں میں اپنے مطلوبہ معاشی اہداف با آ سانی حا صل کر سکتا ہے،انہوں نے کہا کہ پاکستان میں مہنگائی 38 فیصد سے کم ہو کر سنگل ڈیجٹ پر آگئی ہے۔

پالیسی ریٹ ساڑھے 22 فیصد سے کم ہو کر 12 فیصد پر آگیا ہے، سٹاک مارکیٹ روزانہ کی بنیاد پر کامیابی کی بلندیوں کو چھو رہی ہے، حکومت نے حال ہی میں بجلی کی قیمتوں میں نمایاں کمی کی ہے جس کا مقصد ہر صنعت کی پیداواری لاگت اور بنیادی اشیا ء ضرور یہ کی قیمتوں میں کمی لانا ہے اور نوجوانوں کے لئے روز گار کے مواقع پیدا کرنا ہے۔ وزیر اعظم نے کہا کہ ہم مشترکہ منصوبوں سے سب کو خوشحالی و ترقی کی طرف لے جانا چاہتے ہیں، دنیا نے زراعت میں بہت ترقی کی اور آگے نکل گئی لیکن ہم قیمتی وقت کا ضیاع کرتے رہے۔

وزیرِ اعظم نے کہا کہ وزیرِ تجارت سمیت متعلقہ محکموں کو شاندار ایونٹ پر مبارکباد دیتا ہوں،وزیرِ اعلیٰ پنجاب مریم نواز اور وزیرِ اعلیٰ سندھ مراد علی شاہ بہت اچھا کام کر رہے ہیں،انہوں نے کہا کہ نمائش میں زرعی مشینری، قیمتی پتھر، ادویات اور دیگرشاندار اسٹالز ہیں، ہمیں جدت، تحقیق اور ترقی کی طرف جانا ہے، رواں سال 2025کا یہ بہترین پروگرام ہے جس میں تجارتی و اقتصادی لحاظ سے کامل مہارت کا مظاہرہ کیا گیا ہے جبکہ چین ، افریقہ ،مشرق وسطی ، یورپ امریکہ ، ترکی اور دیگر ممالک سے معززین کو دیکھ کر خوشی ہو ئی ہے ۔

میں نے ایک ایسے تاریخی مقام کا دورہ کیا ہے جہاں زراعت و صنعت کے میدان میں سرمایہ کاری کے بے پناہ مواقع موجود ہیں جن سے فائدہ حاصل کر کے دو طرفہ ممالک کے درمیان تجارت ودوستانہ تعلقات کو فروغ دیا جاسکتا ہے جس سے بے روز گاری میں کمی اور زرمبادلہ میں اضافہ ممکن ہے ، انہوں نے کہا کہ یہی موقع ہے کہ پاکستان تمام ممالک کو ملک میں بلا خوف و خطر سرمایہ کاری اور اقتصادی سرگرمیوں کے آ غاز کی دعوت دیتا ہے۔

انجینئرنگ، فارماسیوٹیکل، زرعی مشینری، سرجیکل آلات، انفارمیشن ٹیکنالوجی ،ہمارے پاس نہایت قابل اور نوجوان قیادت موجود ہے جس سے استفادہ کر کے ہم اپنی ملکی معیشت مستحکم کرسکتے ہیں۔ نمائش میں860 غیر ملکی مندوبین نے شرکت کی، اس موقع پر کئی ملکوں کے ساتھ سمجھوتوں اور معاہدوں پر دستخط بھی کئے گئے ۔