نائب وزیراعظم و وزیر خارجہ اسحاق ڈاراور یونانی وزیر خارجہ کے درمیان ٹیلیفونک رابطہ،علاقائی صورتحال پر تبادلہ خیال
ایتھنز (پرویز مغل سے) نائب وزیر اعظم و وزیر خارجہ سینیٹر محمد اسحاق ڈار نے یونان کے وزیر خارجہ جارجگیرابیٹریٹس سے ٹیلیفون پر گفتگو کی۔ انہوں نے بھارت کے بے بنیاد الزامات اور غیر قانونی یکطرفہ اقدامات کو سختی سے مسترد کیا، جن سے خطے کا امن خطرے میں ہے۔
نائب وزیراعظم و وزیر خارجہ سینیٹر محمد اسحاق ڈار نے علاقائی امن اور سلامتی کے لئے خطرہ کا باعث بننے والےبھارت کے بے بنیاد الزامات،غلط معلومات کی مہم اور غیر قانونی یکطرفہ اقدامات کو واضح طور پر مسترد کرتے ہوئے سندھ طاس معاہدے کو ملتوی کرنے کے بھارت کے یکطرفہ فیصلے کی بھی شدید مذمت کی جو اس کی بین الاقوامی ذمہ داریوں کی صریح خلاف ورزی ہے۔
انہوں نے پاکستان کی جانب سے حقائق کو سامنے لانے کے لیے آزاد اور شفاف تحقیقات کے مطالبے کا اعادہ کیا،کشیدگی کو روکنے اور امن واستحکام کے تحفظ کے لیے تحمل کی اہمیت پر زور دیا۔
یونانی وزیر خارجہ نے غیر جانبدار اور شفاف انکوائری کے لیے پاکستان کی تجویز کا خیر مقدم کیا، دونوں ممالک کے درمیان سفارتی ، تجارتی ، معاشی تعلقات کو مزید فروغ دینے کے متعلق بھی تبادلہ خیال ہوا۔
دونوں رہنمائوں نے خاص طور پر کثیر الجہتی فورمز بشمول اقوام متحدہ کی سلامتی کونسل کے غیر مستقل رکن کے طور پر علاقائی اور عالمی پیش رفت پر قریبی رابطوں کو برقرار رکھنے پر اتفاق کیا۔