لمرک آئرلینڈ (وسیم بٹ سے) ایسوسی ایشن آف آئرش پاکستانی فزیشنز اینڈ سرجنز کے زیر اہتمام آئرلینڈ کے تیسرے بڑے شہر لمرک کے مقامی ہوٹل ساؤتھ کورٹ میں ایک پروقار تقریب کا انعقاد کیا گیا جس میں مختلف شعبہ ہے زندگی سے تعلق رکھنے والے خواتین و حضرات جن میں ڈاکٹرز ،آئی ٹی پروفیشنلز ،پی ایچ ڈی ہولڈرز ،کاروباری حضرات اور دیگر نے کثیر تعداد میں شرکت کی تقریب کی مہمان خصوصی سفیر پاکستان محترم عائشہ فاروقی تھی، آپ کے ہمراہ ہیڈ آف چانسری شاہد اقبال اور سفارتخانہ پاکستان کے دیگر افراد بھی تھے۔
سفیر پاکستان عائشہ فاروقی جب ہال میں تشریف لائی تو تالیوں کی گونج سے آپ کا پرتپاک استقبال کیا گیا عادیہ نعمان اور انزک نعمان نے مہمان خصوصی کو پھولوں کا گلدستہ پیش کیا ۔تقریب کا باقاعدہ آغاز تلاوت قرآن پاک اور نعت رسول مقبولؐ سے کیا گیا جس کی سعادت (راقم) وسیم بٹ نے ادا کی جبکہ نظامت کے فرائض ڈاکٹر عثمان حیدر لیل نے ادا کیے ۔
ایسوسی ایشن آف آئرش پاکستانی فزیشنز اینڈ سرجنز کے ایگزیکٹو ڈاکٹر جاوید سعید نے تمام معزز مہمانوں کو خوش آمدید کہا اور تقریب کے اغراض و مقاصد سے حاضرین کو بریف کیا ایسوسی ایشن آف آئرش پاکستانی فزیشنز اینڈ سرجنز کے صدر ڈاکٹر نعمان نبی نے ایسوسی ایشن کے قیام اور اس کے اغراض و مقاصد پر بات کرتے ہوئے کہا کہ ہماری تنظیم کے قیام کا مقصد ایک تو تمام ڈاکٹرز برادری کو ایک پلیٹ فارم تلے جمع کرنا اور نئے آنے والے ڈاکٹرز کی رہنمائی کرنا ہے اور اگر بات کی جائے آج کی اس تقریب کی تو اس کا مقصد صرف یہ ہے کہ ہم ڈاکٹرز برادری کے علاوہ دیگر طبقات جن میں آئی ٹی پروفیشنلز ،پی ایچ ڈی ہولڈرز ،سٹوڈنٹس ،کاروباری حضرات اور پاکستانی کمیونٹی کے دیگر حضرات کو اس تقریب میں جمع کر کے ان کے مسائل اور ان کے حل کے لیے غور و خوض کرنا ہے ۔
سفیر پاکستان محترمہ عائشہ فاروقی نے تقریب سے خطاب کرتے ہوئے کہا کہ میرا یہ لمرک سٹی کا پہلا وزٹ ہے اور مجھے یہاں آ کر بہت خوشی محسوس ہوئی کہ آپ نے اتنی خوبصورت تقریب کا انعقاد کیامیرے آنے کا مقصد ایک تو یہ ہے کہ اپنی پاکستانی کمیونٹی سے ملاقات کی جائے اور دوسرا آپ کے مسائل اور آپ کی آراء و تجاویز جو بالخصوص سفارتخانہ پاکستان سے متعلق ہوں انہیں براہ راست آپ سے سنا جائے اور پھر ان کے حل کے لیے پیش رفت کی جائےمجھے تمام مقررین کی گفتگو اور اپنی پاکستانی سے مل کر بڑی خوشی ہوئی اور میں آپ سب کو خراج تحسین پیش کرنا چاہتی ہوں کہ جس حوصلہ ہمت ایمانداری اور محنت کے ساتھ مختلف شعبہ جات میں آپ نے پاکستان کا پرچم سر بلند کیا ہے ۔
میری کوشش ہے کہ ہماری پاکستانی کمیونٹی کے افراد جو مختلف شعبہ ہائے زندگی سے تعلق رکھتے ہیں ان میں ڈاکٹرز ۔آئی ٹی پروفیشنلز۔تجارت اور کاروباری طبقہ ۔وکلا برادری اور دیگر کی حوصلہ افزائی کر کے انہیں آگاہی دی جائے کہ وہ تجارت و ثقافت اور دیگر شعبہ جات میں پاکستان اور آئرلینڈ کے درمیان تعلقات کو بڑھانے اور انہیں مزید مضبوط کرنے میں اپنے اہم کردار ادا کریں ۔
اس موقع پر سوال و جواب کی ایک نشست کا بھی اہتمام کیا گیا جس میں پاکستانی کمیونٹی کو پاسپورٹ ۔ویزا اور نادرہ کارڈ کے حصول کے لیے پیدا ہونے والی مشکلات کے بارے میں سفیر پاکستان کو آگاہ کیا گیا جس پر انہوں نے تمام مسائل کو ترجیحی بنیادوں پر حل کرنے کی یقین دہانی کروائی ۔
ایسوسی ایشن کے صدر ڈاکٹر نعمان نبی نے اظہار تشکر کے کلمات ادا کرتے ہوئے سفیر پاکستان محترمہ عائشہ فاروقی اور دیگر معزز مہمانوں کا شکریہ ادا کیا ۔سفیر پاکستان محترمہ عائشہ فاروقی کی خوش شکل، خوش لباس، خوش اخلاق اور شائستہ گفتگو نے حاضرین کو بہت متاثر کیا اور وہ آپ کی گفتگو کے فورا بعد آپ کے گرد جمع ہو گے اور بے شمار تصاویر بھی بنوائی ۔ اور آخر میں حاضرین کی تواضع ہے پاکستانی کھانوں۔چائے اور کافی سے کی گئی