ایسٹر کے جشن میں قونصلیٹ جنرل آف پاکستان دبئی کے قونصل جنرل کی شرکت
پادری ولسن جارج نے تقریب میں شرکت پر قونصل جنرل اور قونصلیٹ کے حکام کا شکریہ ادا کیا
قونصلیٹ افسران نے ایسٹر کے موقع پر امن، خوشحالی اور خوشی کیلئے دلی خواہشات کا اظہار کیا
دبئی (طاہر منیر طاہر سے) قونصلیٹ جنرل آف پاکستان دبئی کےقونصل جنرل حسین محمد نے 20 اپریل 2025 کو شارجہ کے ایک ہوٹل میں منعقدہ ایک خصوصی تقریب میں پاکستانی مسیحی برادری کے ساتھ ایسٹر کا جشن منایا۔ دبئی قونصلیٹ کے قونصل جنرل حسین محمد نے اس موقع پر بطور مہمان خصوصی شرکت کی اور کمیونٹی ممبران کو ایسٹر کی مبارکباد دی۔
اپنے خطاب میں قونصل جنرل نے پاکستانی مسیحی برادری کی تعلیم، صحت کی دیکھ بھال اور دیگر اہم شعبوں میں ان کی گراں قدر خدمات کو سراہا۔ انہوں نے کہا کہ متحدہ عرب امارات میں تمام پاکستانی بغیر کسی عقیدے کے، ملک کے اتحاد اور تنوع کی نمائندگی کرتے ہیں۔
قونصل جنرل حسین محمد نے کہا کہ آپ ہمارے سفیر ہیں، پاکستان کی نمائندگی کر رہے ہیں اور آپ کی کامیابیاں ہماری قوم کے لیے باعث فخر ہیں۔ انہوں نے رواداری، مساوات اور باہمی احترام پر مبنی ایک جامع معاشرے کو فروغ دینے کی اہمیت کو مزید اجاگر کیا۔
کمیونٹی ویلفیئر اتاشی عمران شاہد اور جنید مرتضیٰ نے بھی تقریب میں شرکت کرتے ہوئے اس تہوار کے موقع پر امن، خوشحالی اور خوشی کے لیے دلی خواہشات کا اظہار کیا۔ پادری ولسن جارج نے تقریب میں شرکت پر قونصل جنرل اور قونصلیٹ کے حکام کا شکریہ ادا کیا۔