چیئرمین ایمریٹس کرکٹ شیخ نہیان مبارک النہیان سے یو اے ای T20 لیگ میں شامل ٹیموں کے مالکان کی ملاقات

دبئی(نمائندہ خصوصی) یو اے ای T20 لیگ میں شامل ٹیموں کے مالکان مسٹر اورم گلیزر اور کرن کمار نے یو اے ای T20 لیگ کے چیئرمین اور امارات کرکٹ بورڈکے وائس چیئرمین خالد الزرونی اور ایمریٹس کرکٹ کے سیکرٹری جنرل مبشر عثمانی کے ساتھ دبئی ایکسپو کا دورہ کیا ، انہوں نے امریکہ اور ہندوستان سمیت دیگرپویلینز کا وزٹ کیا اور پورے سیٹ اپ سے بہت متاثر ہوئے اس دورے کے دوران انہوں نے امارات کرکٹ بورڈکے چیئرمین عزت مآب شیخ نہیان مبارک النہیان سے ملاقات بھی کی ۔

یو اے ای T20 لیگ کے چیئرمین اور وائس چیئرمین ایمریٹس کرکٹ بورڈ خالد الزرونی نے اس موقع پر کہنا تھا کہ ہمیںمسٹر اورم گلیزر اور ان کے ساتھیوں کا دبئی میں خیرمقدم کرتے ہوئے خوشی ہوئی انہوں نے مزید کہا کہ کرن کمار سے مل کر ہمیشہ خوشی ہوتی ہے جو اب اپنا زیادہ تر وقت دبئی میں گزارتے ہیں ۔ خالد الزرونی کا کہنا تھا کہ ایکسپو 2020کا مختصر دورہ اور ہز ہائینس کے ساتھ ملاقات بہت ہی خوش آئند اور اعزاز کی بات ہے۔

ڈاکٹر طیب کمالی، ECB بورڈ کے ممبر اور ECB سلیکشن کمیٹی کے چیئرمین نے کہا کہ ایوی گلیزر اور کرن کمار دونوں سے مل کر خوشی ہوئی۔ہم خاص طور پر یو اے ای T20 لیگ کے لیے اپنے مشترکہ وژن کے مطابق کام کر رہے ہیںاورلیگ کے ٹیم مالکان کے جذبے اور عزم کے ساتھ، افتتاحی سیزن دنیا بھر کے کرکٹ شائقین کے لیے انتہائی دلچسپ اور انٹرٹینمنٹ سے بھرپور ہوگا جو دنیائے کرکٹ میں اپنی پہچان بنائے گا۔

یاد رہے کہ یو اے ای T20 لیگ ایک پیشہ ور فرنچائز پر مبنی T20 فارمیٹ کرکٹ ٹورنامنٹ ہے جس میں 6 فرنچائز ٹیمیں شامل ہورہی ہیں اور اس ایونٹ میں 34میچز کھیلے جائیں گے لیگ رواں سال متحدہ عرب امارات میں کھیلی جائے گی ۔