اسٹاک ہوم ہانینگے میں منہاج القرآن انٹرنیشنل کے زیراہتمام شاندار افطار ڈنر، فلاحی منصوبوں پر روشنی ڈالی گئی
اسٹاک ہوم (زبیر حسین سے) سویڈن کے دارالحکومت سٹاک ہوم میں منہاج القرآن انٹرنیشنل ہانینگے کے زیر اہتمام ایک شاندار افطار ڈنر کا اہتمام کیا گیا، جس میں پاکستانی کمیونٹی کے مختلف شعبہ جات سے تعلق رکھنے والے افراد نے بھرپور شرکت کی۔ اس افطار ڈنر کا مقصد منہاج ویلفیئر فاؤنڈیشن کے فلاحی منصوبوں کے متعلق آگاہی دینا تھا۔
افطار ڈنر کا آغاز تلاوت قرآن پاک اور نعت رسول مقبول صلی اللہ علیہ وآلہ وسلم سے ہوا۔ صدر منہاج ویلفیئر سویڈن میاں یاسین اعجاز نے رمضان میں زکوٰۃ اور صدقات کی اہمیت پر روشنی ڈالی۔ انہوں نے منہاج ویلفیئر فاؤنڈیشن کی اب تک کی خدمات اور 2025 کے فلاحی اہداف کے بارے میں بھی آگاہ کیا۔
میاں یاسین اعجاز نے بتایا کہ فاؤنڈیشن یتیم بچوں کے لیے آرفن کیئر سینٹر، غریب افراد کے لیے سحری و افطاری کا اہتمام، خشک راشن کی فراہمی، صاف پانی کے منصوبوں اور "اور گرلز اور فیوچر” کے تحت بچیوں کی تعلیم اور غریب لڑکیوں کی اجتماعی شادیوں کے منصوبوں پر کام کر رہی ہے۔ انہوں نے بتایا کہ فاؤنڈیشن نے اب تک ہزاروں مستحق افراد کی مدد کی ہے اور مستقبل میں بھی یہ سلسلہ جاری رکھا جائے گا۔
نائب صدر منہاج القرآن انٹرنیشنل سویڈن ڈاکٹر عبدالرزاق اور جوائنٹ سیکرٹری آصف شکور نے منہاج انسٹیٹیوٹ کی خدمات کے بارے میں بھی معلومات فراہم کیں۔ انہوں نے بتایا کہ انسٹیٹیوٹ مختلف تعلیمی اور تربیتی پروگرامز چلا رہا ہے، جن سے کمیونٹی کے افراد مستفید ہو رہے ہیں۔ انہوں نے کہا کہ انسٹیٹیوٹ نوجوانوں کو دینی اور دنیاوی تعلیم فراہم کرنے کے ساتھ ساتھ انہیں روزگار کے مواقع بھی فراہم کر رہا ہے۔
اس موقع پر حاضرین نے صدقات، زکوٰۃ اور فطرانہ کی مد میں عطیات جمع کرائے اور مزید تعاون کی یقین دہانی کرائی۔ انہوں نے کہا کہ منہاج ویلفیئر فاؤنڈیشن صحیح معنوں میں مستحق خاندانوں کی کفالت کر رہی ہے اور ہمارے عطیات کو مستحق افراد تک پہنچا کر اپنا حق ادا کر رہی ہے۔ انہوں نے فاؤنڈیشن کی خدمات کو سراہتے ہوئے کہا کہ یہ ادارہ انسانیت کی خدمت کے لیے ایک روشن مثال ہے۔
اس افطار ڈنر نے نہ صرف رمضان المبارک کی برکات کو اجاگر کیا بلکہ منہاج ویلفیئر فاؤنڈیشن کے فلاحی کاموں کو بھی فروغ دیا۔ پاکستانی کمیونٹی نے فاؤنڈیشن کے فلاحی کاموں میں بھرپور تعاون کا عزم کیا۔
منہاج ویلفیئر فاؤنڈیشن کے اہم منصوبے:
- یتیم بچوں کے لیے آرفن کیئر سینٹر
- غریب افراد کے لیے سحری و افطاری کا اہتمام
- خشک راشن کی فراہمی
- صاف پانی کے منصوبے
- "اور گرلز اور فیوچر” کے تحت بچیوں کی تعلیم
- غریب لڑکیوں کی اجتماعی شادیاں
منہاج انسٹیٹیوٹ کی خدمات:
- تعلیمی پروگرامز
- تربیتی پروگرامز
- روزگار کے مواقع