پاکستانی ٹرک آرٹ کو جدید طرز پر متعارف کروانے سے دنیا پاکستان کے اصل رنگوں کو بہتر طور پر جان پائےگی: ڈاکٹر محمد فیصل

پاکستان کی 75 سالہ آزادی کی تقریبات کے سلسلے میں سفارت خانہ پاکستان کی جانب سے مشہور ٹرک آرٹس کے نمونوں کی نمائش کا انعقاد

برلن(رپورٹ:مہوش ظفر)پاکستان کی 75 سالہ آزادی کی تقریبات کے سلسلے میں سفارت خانہ پاکستان کی جانب سے پاکستان ہا ئوس برلن میں مشہور ٹرک آرٹس پھول پتی کے ٹرک آرٹ کے نمونوں کی نما ئش کا انعقاد کیا گیا۔

تقریب سے خطاب کرتے ہو ئے پاکستانی سفیر ڈاکٹر محمد فیصل کا کہنا تھا کہ پاکستان ثقافتی و سماجی اعتبار سے ایک آسودہ اور پرکشش ملک ہے جو اپنے سیاحوں کی دلچسپی کے لئے اصناف کی ایک طویل فہرست پیش کرتا ہے، ہماری موسیقی، کھانے، قدرتی نظارے اور فن تعمیر دنیا بھر میں مشہور ہیں اور اپنے چاہنے والوں کو مسحور کرتے ہیں۔

سفیر پاکستان ڈاکٹر محمد فیصل نے اس موقع پر شرکاء سے خطاب کرتے ہو ئے کہا کہ ٹرک ملک میں نہ صرف نقل و حمل کے ذریعے کے طور پر استعمال کئے جاتے ہیں بلکہ اپنی منفرد و رنگین ہیت کے ساتھ لوگوں کی توجہ کا مرکز بنتے ہیں۔ دیکھنے والے نہ صرف انکی خوبصورتی سے محظوظ ہوتے ہیں بلکہ ان پر لکھی گئی دلچسپ تحاریر بھی لوگوں کو تفریح فراہم کرتی ہیں۔

انہوں نے مزید کہا کہ ٹرک آزا دی اظہار را ئے کے ذریعے کے طور پر بھی کام کرتے ہیں مثلاً مختلف سیاسی اور قومی شخصیات کی تصاویر کے ساتھ مختلف اقوال بھی سڑکوں پر رواں دیکھے جا سکتے ہیں۔ انھوں نے مزید کہا کہ ٹرک آرٹ فن کی بیشتر اصناف مثلاً قدرتی مناظر و جنگلی حیات سے لے کر عقل و دانش و مزاح کا احاطہ کرتا ہے۔آج کی نما ئش مشہور ٹرک آرٹسٹ پھول پتی کی فنکارانہ صلاحیتوں کو جدید طرز سے روشناس کرانے کی ایک کاوش تھی کہ کیسے ٹرک آرٹ کے روایتی نمونےہمارے ارد گرد موجود روز مرہ کی اشیاء کو منفرد اور خوبصورت بنا سکتے ہیں ۔

ڈاکٹر محمد فیصل نے کہا کہ سفارتخانہ پاکستان کا مثبت تشخص ا بھارنے اور دنیا کو پاکستان کے حقیقی رنگوں سے روشناس کرانے کی اپنی کاوشیں جاری رکھے گا۔

اس موقع پر علی سلمان آنچن اور انکی پھول پتی ٹیم کو ستائشی اسناد بھی دی گئیں،نمائش میں شریک غیر ملکی مہمانوں کا کہنا تھا کہ انھیں اس نمائش میں آکر تمام فن پاروں کو دیکھ کر زندہ دلی کا احساس ہوا ہے۔ملاوی سے تعلق رکھنے والے سفارتکار کا نمائش سے م متعلق کہنا تھا کہ اس قسم کی رنگوں سے بھرپور نمائش پاکستان میں سیاحت کے فروغ کے لئے یقیناً کارگر ثابت ہوگی۔

پھول پتی آرٹ کی ٹیم کا کہنا تھا کہ ہم سفیر پاکستان اور سفارتخانہ پاکستان کے بے حد مشکور ہیں کہ جنھوں نے ہمیں اپنے فن کے اظہار کا یوں موقع دیا ۔پھول پتی ٹرک آرٹ کو شرکاء نے سراہتے ہوئے خوب انجوائے کیا اور اسے دیگر ممالک کے ساتھ بہتر تعلقات بنانے کے لئے ایک اہم پیش رفت قرار دیا۔

نمائش میں جرمنی میں تعینات مختلف سفارت کاروں،صحافیوں اور مختلف شعبہ ہا ئے زندگی سے تعلق رکھنے والے افراد نے کثیر تعداد میں شرکت کی، لوگوں نے مختلف فن پاروں میں گہری دلچسپی کا اظہار کیا اور سفارتخانہ و فنکاروں کو پاکستانی ثقافت کی جدید اطوار سے ہم آہنگ فن پاروں کے ذریعے نما ئش منعقد کرنے پر داد دی۔