مقامی فنکاروں اور ٹیم ممبران نے اپنی فیملیز کے ساتھ شریک ہوکر محفل کی رونق بڑھائی
دبئی (طاہر منیر طاہر) پنجاب میوزک گروپ دبئی کی ٹیم کے مقامی فنکاروں نے عید الفطر کی مناسبت سے عید ملن پارٹی کی تقریب کا اہتمام کیا ۔
تقریب میں پنجاب میوزک گروپ انٹر نیشنل کے چیف آرگنائزر نزاکت علی خان جنرل سیکریٹری سلیمان کھوکھر انفارمیشن سیکریٹری حسین وارثی کے علاوہ مقامی فنکاروں اور ٹیم ممبران نے اپنی فیملیز کے ساتھ شریک ہوکر اس محفل کی رونق بڑھائی۔
خاص مہمانوں میں میوزک ڈائریکٹر استاد صابر کے ساتھ معروف سنگر حنان (ہنی خان) طبلہ نواز استاد روکی خان نزاکت علی خان اور حسین وارثی نے موقع کی مناسبت سے اپنے فن سے حاضرین محفل کو محظوظ کیا جسے سب نے بہت سراہا پنجاب میوزک گروپ دبئی ٹیم اپنی تقریبات کی وجہ سے متحدہ عرب امارات میں مقیم پاکستانیوں میں اپنا ایک منفرد مقام رکھتی ہے۔
تقریب کے اختتام پر عمدہ کھانوں سے مہمانوں کی تواضع کی گئی، بعد ازاں پنجاب میوزک گروپ دبئی ٹیم نے مہمانوں کا شکریہ ادا کرتے ہوئے اپنے اگلے پروگرام کے جلد منعقد ہونے کا اعلان کیا۔
